Dipesaleme 102 - BIBELE

Thapelo ya motho ya tsietsing

¹ Thapelo ya motho ya tsietsing, ya imetsweng, ya hlahisang sello sa hae kapele ho Morena.

² Morena, ako utlwe thapelo ya ka; sello sa ka se ke se fihle ho wena.

³ Ha ke le matshwenyehong o se ke wa mpatela fahleho sa hao; ako ntshekehele tsebe, ha ke ipiletsa ho wena, o ke o nkarabe kapele.

⁴ Ditshiu tsa ka di fela jwaloka mosi, masapo a ka a tjha sa patsi mollong.

⁵ Ke otlilwe, pelo ya ka e ka jwang bo omeletseng, ke se ke lebala le ho ja.

⁶ Ka baka la ho fehelwa haholo, nama ya ka e maname, e maname masapong a ka.

⁷ Ke tshwana le letata la lehwatata, ke tshwana le sephooko sa dithako.

⁸ Ke a hlobaela, mme ke a fehelwa, ke ka nonyana e dutseng e inotshi, e dutseng hodima sehlohlolo.

⁹ Dira tsa ka di ntlaka kamehla, ba nkgalefetseng ba nyefola lebitso la ka.

¹⁰ Ke ja molora jwaloka bohobe, seno sa ka se tswakana le meokgo,

¹¹ ka baka la bohale le kgalefo ya hao; hobane o ile wa mphamola, wa nto ntabanya!

¹² Ditshiu tsa ka di tshwana le meriti e theang, ke omella jwaloka jwang.

¹³ Empa wena Morena, o rena kamehla yohle, o tla hopolwa ke meloko yohle.

¹⁴ Ako tsohe, o utlwele Sione bohloko; ke nako jwale ya ho e hauhela, motsotso o fihlile.

¹⁵ Bahlanka ba hao ba kgahlwa ke majwe a yona, ba qenehela le lerole la yona.

¹⁶ Baditjhaba ba tla hlompha, ba hlomphe lebitso la Morena, le dikgosi tsohle tsa lefatshe di tla hlompha tlotla ya hao.

¹⁷ Ha Morena a tsosa marako a Sione, o tla bonahatsa tlotla ya hae, a e bonahatse ho yona.

¹⁸ O tla mamela thapelo ya ba itlhophereng; thapelo eo ya bona a ke ke a e kgesa.

¹⁹ Tsena di ke di ngollwe moloko, moloko o tlang, hore tjhaba se tla tswalwa se tle se rorise Morena.

²⁰ Morena o shebile fatshe a le sehalalelong sa hae se hodimo; o tadimile lefatshe a le mahodimong.

²¹ hore a utlwe mefehelo, mefehelo ya batshwaruwa, a lokolle ba ahloletsweng lefu.

²² Jwale lebitso la Morena le tla bolelwa Sione, dithoko tsa hae Jerusalema,

²³ ha ditjhaba tsohle di phuthehile mmoho, di ena le mebuso ya tsona, ho sebeletsa Morena.

²⁴ O mphokodisitse ke sa le motjha, a kgutsufatsa ditshiu tsa ka.

²⁵ Ka ba ka re: “Modimo wa ka, o se ke wa ntlosa lefatsheng ke sa le mahareng a bophelo ba ka. Wena dilemo tsa hao di akaretsa meloko yohle.

²⁶ O ne o thee lefatshe kgalekgale, mahodimo ke mosebetsi wa diatla tsa hao.

²⁷ Tsena di tla timela, empa wena o tla sala; tsohle di tla tsofala jwaloka seaparo, o tla di lahla jwaloka seaparo, mme di tla nyamela.

²⁸ Empa wena haesale e le wena, dilemo tsa hao di ke ke tsa fela.

²⁹ Bana ba bahlanka ba hao ba tla ba le leaho le tiileng, mme ditloholo tsa bona di tla nne di be teng pela hao.”