Dipesaleme 10 - BIBELE

Thapelo ya ho ikopela thuso

¹ Morena, o emelang hole hakaalo? O ipatelang nakong ya matshwenyeho?

² Ya kgopo o a ikgantsha, o befetse ya hlophehileng; a ke a tshwaswe ke mano ao a a lohileng.

³ Ya kgopo o ithorisa ka merero ya hae e mebe, ya meharo o rohaka Morena, o a mo nyedisa.

⁴ Ya kgopo o swenya dinko, o re: “Modimo ha a phetetse, ha ho na Modimo.” Ke phetho seo a se nahanang.

⁵ Kamehla o atleha mererong ya hae, dikahlolo tsa hao di mo phahametse, dira tsa hae tsohle o di tadima maotong.

⁶ Ka pelong ya hae o re: “Nke ke ka sisinngwa ke letho, nke ke ka hlahelwa ke bobe le ka mohla.”

⁷ Molomong wa hae ho tswa ditlhapa, le mashano le bomenemene, lelemeng la hae ho maname bolotsana, ho maname le bona bokgopo.

⁸ O dula a laletse pela metsana, o bolaya ba se nang molato, o ba bolaya a ipatile. Ka mahlo o tsoma ba tsielehileng,

⁹ o lalla jwaloka tau e bothile selaong sa yona; o lalla jwalo hore a tle a qhautse mohlophehi, a mo qhautse ka ho mo tshwasa ka leraba la hae.

¹⁰ O a qatjhama, a batalle; ya tsielehileng a wele marong a hae.

¹¹ Ka pelong ya kgopo o re: “Modimo o a lebala, o ipatile sefahleho, a ke ke a bona letho le kgale.”

¹² Thusa, Morena! Oho, Modimo, itokisetse ho otla; o se ke wa lebala bahlophehi.

¹³ Ya kgopo o nyedisetsang Modimo, ka pelong ya hae a re: “A ke ke a phetetsa?”

¹⁴ Athe wena o bona bomadimabe le mahlomola; o a di lemoha, mme o a di laola. Ya tsielehileng o tshepile wena, ke wena mothusi wa dikgutsana.

¹⁵ Robokela ya kgopo le e mobe, o phetetse bokgopo ba hae bo fele tu!

¹⁶ Morena ke kgosi kamehla le mehla, baditjhaba ba fedile naheng ya hae.

¹⁷ Morena, o utlwile takatso tsa ba eisehang, o ba matlafatsa dipelo, o ba sekehela tsebe,

¹⁸ ho ahlolela kgutsana le ya hatellwang, hore motho wa lefatshe a se hlole a tshosa ba bang.