Baahlodi 5 - BIBELE

Sefela sa Debora le Barake

¹ Ka lona letsatsi leo Debora, le Barake, mora wa Abinoame, ba bina, ba re:

² “Kaha baetapele ba Iseraele ba eteletse Baiseraele pele, kaha setjhaba se ikentse sehlabelo ka boithaopo, lona rorisang Morena!

³ “Lona dikgosi mamelang, lona mahosana sekehang tsebe, nna ke tla binela Morena, ke binele Morena Modimo, Modimo wa Iseraele.

⁴ “Morena, ha o futuha o etswa Seire, o haola, o etswa naheng ya Edomo, lefatshe la na la thothomela, mahodimo a thwathwaretsaka, e, maru a nesa ya ditlwebelele.

⁵ Dithaba tsa qhibidiha kapela Morena, le Sinai ya qhibidiha kapela Morena Modimo wa Iseraele.

⁶ “Mehleng ya Shamegare mora wa Anate, mehleng ya Jaele ditsela tsa mela mohlwa, batsamai ba hlahlathela ka ditselana.

⁷ Iseraele ya hloka babusi, ya ba hloka ho fihlela nna Debora ke ema ka maoto, ke le mma Baiseraele.

⁸ Ba ikgethela medimo e metjha, ntwa ya eba teng kgorong tsa metse ya bona. Hara ba kete tse mashome a mane tsa Baiseraele, na ho kile ha bonwa thebe kapa lerumo?

⁹ Pelo ya ka e rata balaodi ba Iseraele, lona ba ikentseng sehlabelo sa setjhaba ka boithaopo, lona rorisang Morena!

¹⁰ “Lona ba palamang ditonki, tonki tse tshweu, lona ba dutseng dibutshabutsheng, le lona bo-mofetakatsela, bolelang jwalo.

¹¹ Holehole le marata a bo-rametsu, bakeng tseo ho kguwang metsi ho tsona, teng ba tla pheta ketso tse lokileng tsa Morena, ketso tse lokileng tsa babusi ba hae ba Iseraele; jwale tjhaba sa Morena sa theohela kgorong tsa metse.

¹² “ ‘Phaphama, phaphama, Debora! Phaphama, phaphama, phokola sefela! Tsamaya Barake, mora wa Abinoame, o kganne bathopuwa ba hao!’

¹³ “Masalla a mahosana a theoha, tjhaba sa Morena sa theoha jwaloka bahale ho nthusetsa.

¹⁴ Banna ba Efraime ba theohela naheng ya Amaleke, Benjamine a o latela a le hara mabotho a hao. Balaodi ba theoha ba etswa ha Makiri, ha Sebulone ha tswa ba nkileng mokgele wa molaodi.

¹⁵ Mahosana a Isakare a tsamaya le Debora, Isakare le yena a tsamaya le Barake, ya eba letlaburu retheng tsa hae ho leba kgohlong. Ba morabe wa Rubene ba ferekana, ba ipotsa hore na ba ka ya thusetsa.

¹⁶ Le duletseng hara mehlape ya lona, le mametse makodilo a badisana? Ba morabe wa Rubene ba ferekana, ba ipotsa hore na ba ka ya thusetsa.

¹⁷ Gileade a itulela mose ho Jorodane, Dane yena o duletseng ka dikepeng? Ashere yena o ituletse lebopong la lewatle, o iphomoletse dikoung tsa lona.

¹⁸ Morabe wa Sebulone o ipeile kotsing ya lefu, le wa Nafthali o entse jwalo o le hodima dithaba.

¹⁹ “Dikgosi tsa fihla tsa lwana, dikgosi tsa Kanana tsa lwana di le Taanake, di le Taanake pela metsi a Megido, empa ha di a ka tsa hapa silefera.

²⁰ Dinaledi tsa lwana di le hodimo, tsa lwantsha Sisera di le tseleng ya tsona.

²¹ Molapo wa Kishone wa ba hohola, molapo wa boholoholo, molapo wa Kishone; ba hatakele ka matla, wena moya wa ka!

²² Tlhako tsa dipere tsa tilaka fatshe, tsa tilaka fatshe ha natla di baleha.

²³ “ ‘Rohaka Merose,’ ho rialo ngeloi la Morena, ‘O rohake, o rohake le baahi ba yona, hobane ha ba a ka ba thusa Morena, ha ba a ka ba thusa Morena direng tsa hae.’

²⁴ “Ho lehlohonolo Jaele hara basadi, yena mosadi wa Hebere wa Mokene, o lehlohonolo hara basadi bohle ba phelang ditenteng.

²⁵ Sisera a kopa metsi, Jaele a mo nea lebese, a mo tlisetsa lebejana ka mohope wa mahosana.

²⁶ Ka tsoho le letshehadi a nka thakgisa ya tente, ka tsoho le letona a nka noto, a ngaba Sisera ka yona, a pshatla hata la hae, a kgokgothella thakgisa tlhafunelong ya hae.

²⁷ Sisera a wela fatshe maotong a hae, a wela fatshe, a tjapalla, a wela maotong a hae, a tjapalla, a shwela moo a wetseng teng.

²⁸ “Mma Sisera a hlaha ka fesetere a qamaka, a howa a le kamora lesira, a re: ‘Kariki ya hae ya ntwa e diehile hakaakang? Diqi tsa dipere tsa hae ha di utlwahale keng?’

²⁹ Tse bohlalehlale tsa kgosatsana tsa hae di a mo araba, e, le yena o bile o a ikaraba:

³⁰ ‘Ba hapile, ba arolelana tsa kgapo, mohlabani ka mong o abelwa morwetsana, kapa o abelwa barwetsana ba le babedi; Sisera o abelwa seaparo se mebala, seaparo se mebala, se homilweng; aparo tse pedi, tse homilweng, tsa molaleng, ke tsa ka!’

³¹ “Dira tsohle tsa hao a di ke di timele, Morena, empa ba o ratang ba be jwaloka letsatsi, letsatsi ha le tjhaba ka matla a lona.” Naha ya eba le kgotso ka dilemo tse mashome a mane.