Amose 5 - BIBELE

Setjhaba se memelwa ho baka

¹ Lona ba ntlo ya Iseraele, mamelang! Ena ke kodi-ya-malla eo ke e binelang lona:

² “O wele Morwetsana, Iseraele, o wele, a ke ke a hlola a tsoha; o lahlilwe kgerehlwa naheng ya habo, O lahlilwe, ha ho ya mo tsosang.”

³ Morena Modimo o bua tjena: “Motse wa Iseraele o futuhang ka bahlabani, bahlabani ba le sekete, o tla sallwa ke ba lekgolo feela; motsana o futuhang ka ba lekgolo, o tla sallwa ke ba leshome feela.”

⁴ Morena o bua tjena ho ba ntlo ya Iseraele, o re: “Mpatleng, le tle le phele.

⁵ Le se mpatle Bethele, le Gilegale le se kene, leha e le ho fetela Beeresheba, hoba Gilegale e tla fela e thoptjwe, Bethele yona e fetohe nanaola.”

⁶ Batlang Morena, le tle le phele, esere a ikakgela kahara ntlo ya Josefa, a ikakgela sa mollo o tjhesa Bethele, o tjhesa Bethele, ho se ya ka o timang.

⁷ Le madimabe lona ba sothang toka, ba e sothang, ba e fetole leshokgwa. ba e fetole, ba lahlele ho loka fatshe!

⁸ Ya entseng Selemela le Makolobe, a fetola lefifi a le etsa meso, a fifatsa motsheare a o etsa bosiu, a bitsa metsi a lewatle a a nesa hodima lefatshe, lebitso la hae ke Morena.

⁹ O dihela koduwa hodima dinatla, motse o haheleditsweng a o fetole lesupi.

¹⁰ Le hloile ya lwanelang toka, a e lwanela ka makgotleng, le bile le nyedisa ya buang nnete.

¹¹ Kaha le hatakela mofutsana, le mo qobelle ho le fa mabele a hae, le ke ke la dula kahara matlo le a hahile, le a hahile ka majwe, le a betlile; le masimo a morara o motle le a lemme, empa le ke ke la nwa veine ya wona!

¹² Ke tseba palo ya ditlolo tsa lona, le boholo ba dibe tsa lona ke a bo tseba: Le tuba ya lokileng, le tjotjo le e amohele, ha le ahlolele mofutsana ka toka makgotleng.

¹³ Mohlang oo ya bohlale o tla ikgutsetsa, hobane mehla e tla ba e le e mahlonoko.

¹⁴ Batlang tse molemo e seng tse kgopo, e le hore le tle le phele; ke moo Morena Modimo wa mabotho, a tla ba le lona jwalokaha le bolela.

¹⁵ Hloyang bokgopo, le rate tse molemo, ka makgotleng le ahlole ka toka, mohlomong Morena, Morena Modimo wa mabotho, a ka hauhela masalla a Josefa.

¹⁶ Ka baka leo, Morena Modimo wa mabotho, o bua tjena: “Ho tla utlwahala diboko ditseleng kahohle, le dillo tsa mahlomola mabaleng wohle a motse. Balemi ba tla memelwa ho tla lla, ba tsebang kodi-ya-malla ba bokolle.

¹⁷ Masimong wohle a morara ho tla lluwa, hoba ke tla feta kahara lona,” ho rialo Morena.

Letsatsi la Morena

¹⁸ Ho madimabe lona ba hlolohetsweng tsatsi la Morena! Ke hobaneng le hlolohetsweng tsatsi la Morena? Tsatsi leo e tla ba la lefifi, ha e na ho ba tsatsi la lesedi!

¹⁹ Ho tla ba jwalokaha motho a baleha tau, ere a e baleha a kgahlane le bere; kapa jwalokaha a kena ka tlung, ere a phopholetsa leboteng a longwe ke noha.

²⁰ Na tsatsi la Morena ha e tlo ba la lefifi, la lefifi le letsho, la bo-nka-ntjana?

²¹ “Mekete ya lona ya borapedi ke e hloile, ke bile ke a e nyonya; le phutheho tsa lona ha ke di thabele.

²² Leha le ka nketsetsa dinyehelo tsa setjheso, la ntlisetsa le dinyehelo tsa dijo, tsena nke ke be ka di amohela. Leha le ka nketsetsa dinyehelo tsa teboho, la nketsetsa tsona ka dinonneng tsa lona, le tsona nke ke be ka di tadima.

²³ Lerata la dipina tsa lona le ke le fele! Mmino wa harepa tsa lona o a ntena!

²⁴ Empa toka e ke e phalle, e phalle jwaloka noka, ho loka ho ke ho be jwaloka molatswana, ho ke molatswana o phallang kamehla.

²⁵ “Lona ba ntlo ya Iseraele, na le nnyeheletse ka tse hlabilweng, la nketsetsa le tsona dinyehelo ka lemo tse mashome a mane, la di etsa lehwatateng?

²⁶ Le ile la jara Sikute, kgosi ya lona, le Kiune, modingwana wa lona, le modingwana wa lona wa dinaledi, e leng eo le iketseditseng yona.

²⁷ Kahoo ke tla le fallisa, ke le fallisetse ka nqane ho Damaseka,” ho rialo Morena, lebitso la hae ke Modimo wa mabotho.