Amose 2 - BIBELE

Kahlolo ya Moabe

¹ Morena o hua tjena: “Baahi ha Moabe ba ntshitetswe ka makgetlo a se na palo, kahoo ha nka ke ka ba tshwarela; ba tjhesitse masapo, masapo a kgosi ya Edomo, ba a tjhesa a ba a fetoha molora!

² Naha ya Moabe ke tla e tjhesa, matlo a dikwele tsa Keriote ke a timetse. Moabe e tla timela ho le morusu, ho le mokorotlo, ho lla lenaka.

³ Mmusi wa Moabe ke tla mo timetsa, ke mmolaye le mahosana a hae kaofela,” ho rialo Morena.

Kahlolo ya Juda

⁴ Morena o bua tjena: “Baahi ba Juda ba ntshitetswe ka makgetlo a se na palo, kahoo ha nka ke ka ba tshwarela. Ba furaletse Molao wa Morena, ha ba a boloka ditaelo tsa hae; ba kgelositswe ke medingwana bona, eo bo-ntata bona ba neng ba e sebeletsa.

⁵ Naha ya Juda ke tla e tjhesa, matlo a dikwele tsa Jerusalema ke a timetse.”

Modimo o ahlola naha ya Iseraele

⁶ Morena o bua tjena: “Baiseraele le bona ba ntshitetswe ka makgetlo a se na palo, kahoo ha nka ke ka ba tshwarela. Ya lokileng ba mo rekisa tjhelete, mofutsana ba mo rekise meqathatso.

⁷ Ba fokolang ba ba hatakela dihlooho, ba hatakelle hlooho tsa bona leroleng, batlatlapuwa ba ba hlokele toka. Mora le ntatae ba kopanela seotswa, bitso la ka le halalelang ba le hlompholle jwalo.

⁸ Kathoko ho aletare tsohle ba a robala, ba robale ka kobo tse beilweng paneng. Ka Tempeleng ya Modimo wa bona ba nwela veine eo ba lefilweng ka yona.

⁹ Ke ne ke timetse Baamore ba le thibetse tsela, leha ba ne ba le balelele, ba le balelele sa dikedare, ba le matla sa difate tsa dieike. Tholwana tsa bona ka di fedisa, le metso ya bona ka e fothola.

¹⁰ Ke ne ke le ntshe, ka le ntsha naheng ya Egepeta, ka le ntsha, ka le tsamaisa lehwatateng, ka le tsamaisa ka lemo tse mashome a mane, ho ya le nea naha ya Baamore.

¹¹ Hara bara ba lona ka hlahisa baporofeta, hara bahlankana ba lona ka hlahisa bakgethwa. Na ha ho jwalo, lona tjhaba sa Iseraele?” ho rialo Morena.

¹² “Empa bakgethwa le ba nwesitse veine, la ba la hanela baporofeta, la ba hanela ho porofeta.

¹³ “Bonang, ke tla le ripitla, ke le pidile sa koloi e qeqeketse haholo.

¹⁴ Ba lebelo ba ke ke ba phonyoha, matla a diqhobane a ke ke a di thusa, le mohlabani a ke ke a ipholosa.

¹⁵ Ya fulang ka motsu a ke ke a ema, mohlabani ya lebelo a ke ke a phonyoha, le mopalami a ke ke a ipholosa.

¹⁶ Le bahale ba bahale ba tla baleha, ba balehe ba le poosho mohla tsatsi leo,” ho rialo Morena.