2 Samuele 22 - BIBELE

Sefela sa Davida sa tlholo

¹ Mohla Morena a namoletseng Davida matsohong a dira tsa hae, le matsohong a Saule, Davida a binela Morena sefela sena,

² a re: “Morena ke lehaha la ka, ke qhobosheane ya ka, ke monamoledi wa ka.

³ Modimo ke lefika la ka, leo ke tshabelang ho lona, ke thebe ya ka, ke lenaka la ka le mpholosang, ke seqhobo sa ka, ke setshabelo sa ka; ke Mopholosi wa ka, o mpholosa kgatellong.

⁴ Ke ipiletsa ho Morena ya lokelang ho roriswa, mme ke pholoswa direng tsa ka.

⁵ “Maqhubu a lefu a ne a ntikile, phororo tsa timelo di ne di nkukile.

⁶ Maraba a lefu a ne a mpotapotile, difi tsa lefu di ne di ntjhehile.

⁷ Makaqabetsing a ka ka ipiletsa ho Morena, e, ka ipiletsa ho Morena wa ka, a utlwa lentswe la ka a le ka Tempeleng ya hae, sello sa ka sa fihla tsebeng tsa hae.

⁸ “Lefatshe la reketla, la thothomela, metheo ya lehodimo ya tsukutleha, ya reketla hobane a halefile.

⁹ Mosi wa foqoha ka nkong tsa hae, mollo o timetsang wa betseha ka hanong la hae, mashala a hlenneng a tswa ho yena.

¹⁰ A phetla mahodimo, a theohela fatshe, leru le letsho le le maotong a hae.

¹¹ A fofa a palame kerubime, a hoballa a le mapheong a moya.

¹² Lefifi a le etsa lesira la hae, maru a matsho, a dusang pula, wona a a etsa tente ya hae.

¹³ Maru a apolwa ke kganya e mo etellang pele, ha na sefako sa mashala a tukang.

¹⁴ Morena a thwathwaretsa, a thwathwaretsa a le mahodimong, Ya Hodimodimo a utlwahatsa lentswe la hae.

¹⁵ A fula ka metsu ya hae, dira tsa qhalana, a betsa mahadima, mme tsa phasaphasa.

¹⁶ Madiba a mawatle a bonahala tlasetlase, metheo ya lefatshe ya phetleha ha ho omana wena Morena, ha ho foka moya o tswang ka nkong tsa hao.

¹⁷ “Morena a nnanabela a le hodimo, a nnanabela, a ntshwara, a nkinola metsing a lewatle.

¹⁸ A nnamolela sereng sa ka se matla, ho ba ntlhoileng, ba neng ba mphekisa.

¹⁹ Ba mphutuhela mohla tlokotsi ya ka, empa Morena a nthusetsa.

²⁰ A nkisa bakeng se batsi, a ntokolla hobane a nthata.

²¹ “Morena o mputsitse ho ya ka ho loka ha ka, o mpuseleditse ho ya ka ho hloka molato ha ka.

²² Ke tiiseditse tseleng ya Morena, ha ke a etsa bokgopo, ka arohana le Modimo wa ka.

²³ Ke fadimehetse dikahlolo tsa hae tsohle, ha ke a qhelela taelo tsa hae kathoko.

²⁴ Mahlong a hae ha ke na kodi, ke ipolokile ke se na molato.

²⁵ Morena o mputsitse ho ya ka ho loka ha ka, hobane o a bona hore ke hlwekile.

²⁶ “Ho ya tshepahalang, o a tshepahala; ho ya se nang kodi, o hloka kodi.

²⁷ Ho ya hlwekileng, o hlwekile, empa ho molotsana o masene.

²⁸ Ke wena ya pholosang setjhaba se hlophehileng, empa o kokobetsa baikgohomosi.

²⁹ Morena, ke wena lebone la ka, Morena o bonesa lefifi la ka.

³⁰ Ka thuso ya hae ke thula dira tsa ka, ka thuso ya Modimo wa ka nka tlola lerako.

³¹ “Tsela tsa Modimo di phethehile, tshepiso tsa Modimo ke tsa nnete, yena ke thebe ya bohle ba tshabelang ho yena.

³² Modimo ke mang, haese Morena? Lefika ke mang, haese Modimo wa rona?

³³ Ke yena Modimo ya mmatlafatsang, ya ntsamaisang tseleng e ntle.

³⁴ O potlakisa maoto a ka jwaloka a kgama, o mpea hodima dihlaba.

³⁵ O nthuta ho lwana, o nthuta le ho hula seqha sa lethose.

³⁶ O nneile thebe ya hao e pholosang, paballo ya hao e a nkgodisa.

³⁷ O ntlhekela tsela e batsi, maoto a ka ha a thelle.

³⁸ “Ke lelekisitse dira tsa ka, ka ba ka di tshwara, ha ke a ka ka kgutla ke eso di timetse.

³⁹ Ke di hlathile, hoo di ke keng tsa tsoha, e, di wetse tlasa maoto a ka.

⁴⁰ O mmatlafaletsa ntwa, ba ntwantshang o ba bea tlasa ka.

⁴¹ O etsa hore dira tsa ka di ntshupe ka direthe, ba ntlhoileng ke a ba timetsa.

⁴² Ba llela thuso, ba hloka mopholosi, ba llela Morena, ha a ba arabe.

⁴³ Ke ba thumisa jwaloka lerole, jwaloka lerole la lefatshe, ke ba hatakela jwaloka seretse, jwaloka seretse se tseleng.

⁴⁴ “O nnamoletse meferefereng ya setjhaba, wa nketsa mmusi wa ditjhaba, ditjhaba di a ntshebeletsa, ditjhaba tseo ke neng ke sa di tsebe.

⁴⁵ Hang ha di nkutlwa, di a mmamela, di ipea tlasa puso ya ka ha di mpona.

⁴⁶ Ditjhaba di kgathala matla, di tswa di thothomela qhobosheaneng tsa tsona.

⁴⁷ “Morena o a phela! Ho bokwe Lefika la ka! Modimo, Mopholosi wa ka, a ke a thoholetswe!

⁴⁸ Modimo ya ntshitsang ka diphetetso, ya beang ditjhaba tlasa ka,

⁴⁹ ya nnamolelang direng tsa ka, ya mphahamisetsang kahodimo, kahodimo ho ba ntwantshang, o nnamolela diatleng tsa ba sehloho.

⁵⁰ “Ka baka leo, ke tla o boka hara ditjhaba, ke roke lebitso la hao, Morena.

⁵¹ Wena ya neang kgosi ya hao, ya e neang tlholo e kgolo, ya bontshang mohau ho motlotsuwa wa hao, ho Davida le ditloholo tsa hae kamehla le mehla.”