1 Timothea 2 - BIBELE

Tsa thapelo

¹ Pele ho tsohle, ke kgothaletsa hore dikopo, dithapelo, dithapello le diteboho di etsetswe batho bohle,

² le dikgosi le bohle ba hlomphehang, e le hore re tle re phele bophelo ba boiketlo le ba kgotso ka borapedi le ka boitlhompho.

³ Hona ho hotle, mme ho kgahlisa Modimo, Mopholosi wa rona,

⁴ ya ratang hore batho bohle ba pholohe, mme ba tsebe nnete.

⁵ Modimo o mong, le mmoelanyi pakeng tsa Modimo le batho o mong, e leng Kreste Jesu eo e leng motho,

⁶ ya ikentseng tefello ya bohle. Bopaki ba hona bo ile ba bonahala ka nako ya teng.

⁷ Ke ka baka lena ke kgethetsweng ho ba sebohodi le moapostola, le moruti wa baditjhaba ya rutang tumelo le nnete; ke bua nnete, e seng leshano.

⁸ Ke lakatsa hore dibakeng tsohle banna ba rapele, ba phahamise matsoho a se nang molato, ho se kgalefo kapa ngangisano.

⁹ Ka mokgwa o jwalo, diaparo tsa basadi e be tse lokelang. Ba ikgabise ka tshwanelo le ka boitlhompho, e seng ka ho fora moriri, kapa ka mekgabiso ya kgauta, kapa ka mabenyane a bohlokwa, kapa ka diaparo tse theko e boima.

¹⁰ Ba ikgabise ka diketso tse lokileng, tse tshwanelang basadi ba ipolelang hore ba hlompha Modimo.

¹¹ Mosadi a mamele thuto a kgutsitse, ka boikokobetso bohle.

¹² Ha ke dumelle mosadi ho ruta kapa ho laola monna, empa o lokela ho kgutsa,

¹³ hobane Adama o ile o boptjwa pele, ya nto ba Eva.

¹⁴ Hase Adama ya ileng a thetswa, ke mosadi ya ileng a thetswa, mme a tlola molao.

¹⁵ Empa basadi ba tla pholoswa ka ho beleha bana, ha feela ba tiisetsa tumelong, le leratong, le kgalalelong, mme ba itlhompha.