1 Dikronike 16 - BIBELE

¹ Baiseraele ba tla le areka ya Modimo, ba e bea bohareng ba tente eo Davida a e hlometseng yona. Ba etsetsa Modimo dinyehelo tsa setjheso, le dinyehelo tsa teboho.

² Ha Davida a qetile ho etsa dinyehelo tsa setjheso le dinyehelo tsa teboho, a hlohonolofatsa setjhaba ka lebitso la Morena.

³ Yaba o abela monna e mong le e mong, le mosadi e mong le e mong wa Moiseraele senkgwa sa bohobe, le leqahadi la nama, le diphaphatha tsa mangangajane a morara.

⁴ Davida a kgetha ba bang ba Balevi ho sebeletsa kapele ho areka ya Morena, ho ipiletsa ho Morena, le ho leboha, le ho boka Morena Modimo wa Iseraele.

⁵ Asafo ya eba yena hlooho, a hlahlangwa ke Sekariya. Bo-Jeiele, le Shemiramote, le Jehiele, le Matiteya, le Eliabe, le Benaya, le Obede-Edomo, le Jeiele, bona ba ne ba letsa dikatara, le diharepa, athe Asafo yena o ne a letsa matlheretlhere.

⁶ Baprista, bo-Benaya le Jahasiele, bona ba ne ba letsa diterompeta ka nako tsohle, kapele ho areka ya selekane sa Modimo.

Sefela sa Davida sa teboho

⁷ Ka lona letsatsi leo, Davida a laela Asafo le bana babo, mme e le kgetlo la pele, hore ba boke Morena ka sefela sena:

⁸ Lebohang Morena, le ipiletse ho yena, phatlalatsang ketso tsa hae hara ditjhaba.

⁹ Mmineleng, mmineleng difela, le boledise mesebetsi ya hae yohle e hlollang.

¹⁰ Ithoriseng ka lebitso le halalelang la hae: Pelo tsa bohle ba batlang Morena di nyakalle.

¹¹ Ipatleleng Morena le matla a hae, le ipatlele yena le sa kgaotse.

¹² Hopolang mesebetsi e hlollang eo a e entseng, dimakatso tsa hae le kahlolo tsa hae,

¹³ lona bana ba Iseraele, mohlanka wa hae, lona bana ba Jakobo, mokgethwa wa hae.

¹⁴ Ke yena Morena Modimo wa rona, ke yena ya ahlolang lefatshe lohle.

¹⁵ Kamehla o hopola selekane sa hae, lentswe leo a le laetseng meloko e sekete;

¹⁶ selekane seo a se entseng, a se etsa le Aborahama, kano eo a e etseditseng Isaka,

¹⁷ a ba a tiisetsa Jakobo hore ke molao, ke selekane sa hae le Iseraele sa mehla yohle.

¹⁸ A re: “Ke tla o nea naha ya Kanana, e be lefa leo o le abetsweng.”

¹⁹ Ha ba ne ba sa le mmalwana, e le baditjhaba naheng eo;

²⁰ ha ba ntse ba lelera hara ditjhaba, ba tloha mmusong o mong ba eya ho o mong,

²¹ Modimo ha a a ka a dumella motho hore a ba tube, mme ka baka la bona a kgalemela dikgosi.

²² A re: “Le se ke la ama batlotsuwa ba ka, le se ke la etsa baporofeta ba ka hampe.”

²³ Lona ba lefatshe lohle le ke le binele Morena, ka letsatsi le letsatsi le phatlalatse tsa ho pholosa ha hae.

²⁴ Bolelang tsa tlotla ya hae hara ditjhaba, le makatso tsa hae hara merabe yohle.

²⁵ Morena o moholo, o lokelwa ke thoriso e kgolo, o tshabeha ho feta medimo yohle.

²⁶ Medimo yohle ya ditjhaba ke ya bohata, athe Morena yena o entse, o entse mahodimo.

²⁷ Tlotla le hlompho di teng ho yena, matla le kganya di Sehalalelong sa hae.

²⁸ Thoholetsang Morena, lona ditjhaba tsa mefutafuta, thoholetsang tlotla le matla a Morena.

²⁹ Thoholetsang tlotla e lokelang lebitso la Morena, tloong kapele ho yena le mo nyehelleng, kgumamelang Morena le kgabile ka tse halalelang.

³⁰ Lefatshe lohle le thothomele kapele ho yena! O tiisitse lefatshe, le ke ke la sisinyeha.

³¹ Mahodimo a thabe, fatshe le nyakalle, hara matjhaba ho thwe: “Morena ke yena kgosi!”

³² Lewatle le hwase, le tsohle tse ka ho lona, naha e nyakalle, le tsohle tse ho yona.

³³ Jwale difate, merung, di tla bina, di binela Morena ho tla, ha a etla ho ahlola lefatshe.

³⁴ Bokang Morena, hobane o molemo, mohau wa hae ke wa kamehla yohle.

³⁵ E reng: “Modimo, mopholosi wa rona, ako re pholose; ako re phuthe, ho baditjhaba o re namolele, re tle re lebohe lebitso le halalelang la hao, ho boka wena e be motlotlo wa rona.

³⁶ Ho bokwe Morena Modimo wa Iseraele, a bokwe jwale, le kamehla yohle.” Setjhaba sohle sa re: “A ho ke ho be jwalo! Bokang Morena!”

³⁷ Yaba Davida o bea Asafo le bana babo kapele ho areka ya selekane sa Morena, hore ba nne ba sebeletse teng, ho ya kamoo mosebetsi wa letsatsi ka leng o leng kateng.

³⁸ A bea Obede-Edomo le bana babo ba mashome a tsheletseng a metso e robedi hore ba ba thuse. Bo-Obede-Edomo, mora wa Jedutune, le Hosa ya eba balebedi ba monyako.

³⁹ Kapele ho Tente ya Morena, pela aletare e sebakeng sa borapedi se Gibeone, Davida a bea moprista Sadoke le baprista ba bang ba habo hona teng,

⁴⁰ hore ba nne ba etsetse Morena dinyehelo tsa setjheso hodima aletare ya nyehelo ya setjheso hoseng le mantsiboya; ba etse tsohle tse ngotsweng Molaong wa Morena, oo a neng a o laele Baiserale.

⁴¹ Ba ne ba ena le Hemane le Jedutune, le bohle ba neng ba kgethwe, ba bolelwa ka mabitso, hore ba boke Morena, “hobane mohau wa hae ke wa kamehla yohle.”

⁴² Bo-Hemane le Jedutune e ne e le bona ba okametseng baletsi ba diterompeta, le ba matlheretlhere, le ba diletsa tse ding, tse neng di letsetswa ho binela Modimo difela. Bara ba Jedutune e ne e le balebedi ba monyako.

⁴³ Setjhaba sohle sa qhalana, motho ka mong a ikela lapeng ha hae. Davida le yena a tsamaya ho ya hlohonolofatsa ba lelapa la hae.