Jobo 40 - Sesotho 1909/1961 (SO)

¹ Jehova a boela a bua le Jobo, a re:

² Na modumadumi o sa tseka le Ya matla wohle na? Ya pheileng kgang le Modimo a ke a arabe jwale!

³ Yaba Jobo o arabela Jehova, a re:

⁴ Bona ke motho feela, nka reng ho wena na? Ke bea letsoho la ka molomong.

⁵ Ke buile hang, nke ke ka hlola ke araba letho; ke phetile la bobedi, ha ke sa tla hlola ke eketsa letho.

⁶ Yaba Jehova o fetola Jobo, a le sefefong, a re:

⁷ Ako itlame letheka, jwaloka monna; ke tla o botsa, o ke o nthute.

⁸ Na o fela o rata ho senya kahlolo ya ka? O rata ho ntswa hore o itokafatse na?

⁹ A o na le letsoho le kang la Modimo? Lentswe la hao na le ka duma jwaloka la wona na?

¹⁰ O ikapesa jwaloka boholo le ka bokgabane, o ikgabise ka kganya le ka botle!

¹¹ O tshele dikgapatso tsa kgalefo ya hao, o tadime baikgohomosi bohle ho ba kokobetsa hang!

¹² Tadima baikgantshi, o ba dihe; o hatakele ba bolotsana moo ba emeng teng.

¹³ O ba pate kaofela leroleng, o epele difahleho tsa bona lebitleng.

¹⁴ Ke moo le nna ke tla o rorisa, ke re, letsoho le letona la hao le o bolokile.

¹⁵ Tadima jwale Behemothe (kubu), eo ke e entseng jwalokaha ke o entse. E fula jwang jwaloka kgomo.

¹⁶ Bona, jwale, matla a matheka a yona, le bothata ba mesifa ya mpa ya yona.

¹⁷ E sisinya mohatla, e o tiisa jwaloka kedare; mesifa ya dirope tsa yona e lohilwe hammoho;

¹⁸ masapo a yona a ka dipompo tsa koporo, mme dikgopo tsa yona di jwaloka ditshiya tsa tshepe.

¹⁹ Ke mosebetsi o fetisisang wa Modimo; ya e bopileng o e neile lerumo.

²⁰ E ikgella dijo tsa yona dithabeng, moo diphoofolo tsa naha di ipapallang teng.

²¹ E ithoballa meriting ya difate tsa lotuse, mosemeng le mahlakeng.

²² Difate tsa lotuse di e etsetsa moriti, meduwane ya noka e e kopela hare.

²³ Bona, dinoka leha di ka tlala, ha e tshohe letho; e ke ke ya makala, leha Jordane e ka kgokoloha hodima hlooho ya yona.

²⁴ Na o tla leka ho e tshwara, e fadimehile, kapa o e phunye nko, o tle o e holehe na?