Jobo 35 - Sesotho 1909/1961 (SO)

¹ Elihu a boela a isetsa polelo pele, a re:

² Na o hloma hore ke taba e lokileng ha o ipea ya lokileng ho fetisa Modimo na,

³ ha o re: Molemo ho nna e tla ba eng? Seo ke tla se rua ka ho se sebe keng?

⁴ Ke tla etsetsa wena le metswalle ya hao karabo.

⁵ Tadima nqa mahodimong, mme o bone; o tadime maru; a phahamile ho fetisa wena.

⁶ Ha o seba, o ka o etsang kahoo? Leha o ka atisa dibe tsa hao, o o senyeditse kae?

⁷ Ha o lokile, o o thusitse kang? O ruile eng ka mosebetsi wa hao?

⁸ Sebe sa hao se ka senya motho ya jwaloka wena feela, ho loka ha hao ho ka thusa ngwana wa motho feela.

⁹ Batho ba lla ka dihloriso tsa batubi; ba bokolla tlasa bothata ba marena.

¹⁰ Empa ha ho ya botsang, a re: Modimo, Mmopi wa ka, o kae,

¹¹ o re neang dipina tsa thabo hara bosiu, o re fileng bohlale bo fetang ba diphoofolo, le hlalefo e fetang ya dinonyana tsa lehodimo?

¹² Ba fela ba lla, empa Modimo ha o arabe ka baka la boikgohomoso jwa ba babe.

¹³ Tjhe! Modimo o ke ke wa utlwa dithapelo tsa lefeela, Ya matla wohle a ke ke a di ela hloko.

¹⁴ Leha o boletse hore ha o o bone, leha ho le jwalo, nyewe ya hao o pela wona, o o lebelle.

¹⁵ Empa kahobane bohale ba wona ha bo eso ho otle, Jobo o hopola hoba ha o re letho ka bobe,

¹⁶ mme o ntse a ahlamisa molomo wa hae a se na taba; o ntse a bua ditaba tse sa utlwahaleng.