Jobo 33 - Sesotho 1909/1961 (SO)

¹ Empa wena, Jobo, mamela dipolelo tsa ka, o sekehele mantswe a ka kaofela tsebe!

² Bona, ke se ke ahlamisitse molomo wa ka, leleme la ka le se le bua mahalapeng a ka.

³ Taba tsa ka di tla bapa le nnete ya pelo ya ka, melomo ya ka e bolele mehopolo ya ka e hlwekileng.

⁴ Moya wa Modimo o nkentse, pudulo ya Ya matla wohle e a mphedisa.

⁵ Ha o ena le matla, o nkarabe, o emele nyewe ya hao, o itokise.

⁶ Bona, ke ntse ke tshwana le wena pela Modimo; le nna ke bopilwe ka letsopa.

⁷ Ha ho le jwalo, o se ke wa tshoswa ke letsoso la ka, matla a ka a se ke a o imela!

⁸ Tjhe, o se o boletse ditsebeng tsa ka, ke utlwile modumo wa mantswe a hao, wa re:

⁹ Ke hlwekile, ha ho sebe ho nna; ha ke na molato, ha ho bokgopo ho nna;

¹⁰ bonang, Modimo o batla sebaka sa ho nqala, o ntadimile jwaloka hoja ke le sera ho wona;

¹¹ o tshwasitse maoto a ka, o hlwela mehato ya ka kaofela.

¹² Bona, karabo ya ka ke yona ena: O fositse tabeng tseo; hobane Modimo o moholo ho ena le motho.

¹³ O o tsekisa keng ka ho re, ha o ikarabele diketsong tsohle tsa wona?

¹⁴ Leha ho le jwalo, Modimo o bua ka mokgwa o mong, o ntoo bua ka o mong hape, empa ha ho lemohe motho.

¹⁵ O bua ka ditoro, ka dipono tsa bosiu, ha batho ba tshwerwe ke boroko, mme ba robetse diphateng tsa bona.

¹⁶ Ke moo o itshenolang ho batho, o tiisang thuto eo o ba rutang yona;

¹⁷ hore o tle o ntshe motho ketsong tse mpe tsa hae, o mo sesefise boikgantsho;

¹⁸ hore o pholose moya wa hae lebitleng, o mo phemise lerumo le bohale.

¹⁹ Bohloko le bona bo tla ho mo laya diphateng tsa hae, ha a utlwa masapo a hae a opa ho sa kgutse;

²⁰ ha mahalapa a hae a tenwa ke bohobe, a se a sa lakatse dijo tse hlabosang;

²¹ ha dinama tsa hae di fela, ho senyeha botle ba hae, mme ho bonwa masapo feela a hlobodisitsweng;

²² ha moya wa hae o se o atametse lebitla, mme bophelo ba hae bo se bo tla kgaolwa.

²³ Jwale ha ho ka tla ho yena lengeloi le mo hlalosetsang ditaba, le tswang makgotleng a lehodimo, la mo kenya tseleng e lokileng,

²⁴ eba Modimo o a mo hauhela, mme o re ho lona: Mo namole, a tle a se ke a theohela lebitleng, ke bone se ka mo lopollang.

²⁵ Ke ha nama ya hae e se e ntjhafala ho fetisa bonyenyaneng ba hae; o kgutlela matsatsing a botjha ba hae.

²⁶ Ha a rapela Modimo, o tla mo etsetsa mohau, mme o tla bona sefahleho sa wona ka thabo, a buseletswe ho loka ha hae.

²⁷ O bina pela batho, o re: Ke na be ke sitilwe, ka kgopamisa ho loka; empa ha ke a ka ka otlelwa ho tlola ha ka;

²⁸ o lopolotse moya wa ka hore ke se theohele lebitleng; bophelo ba ka bo ntse bo thabetse lesedi.

²⁹ Bona, Modimo o etsa tseo tsohle habedi, hararo, ho motho,

³⁰ ho kgutlisa moya wa motho lebitleng, hore a tle a bonesetswe ke lesedi la bophelo.

³¹ Mamela, Jobo, o be o nkutlwe! o thole, mme ke tla bolela!

³² Ha o ena le pelaelo, o nkarabe; bua, hobane ke rata ho o lokafatsa!

³³ Ha ho se jwalo, o mmamele: Thola, mme ke tla o ruta bohlale.