Jobo 23 - Sesotho 1909/1961 (SO)

Jobo o boela a ikarabela.

¹ Jobo a fetola, a re:

² Le kajeno ho dumaduma ha ka ho sa tletse boikgantsho! Letsoho le dutseng hodima ka le pupetsa mefehelo ya ka.

³ Jo! hola nka tseba moo nka o fumanang teng, hore ke tle ke fihle pela terone ya wona!

⁴ Ke be ke tla hlomahanya taba ya ka pela wona, ke tlatse molomo wa ka ka ditaba!

⁵ Ke be ke tla tseba ditaba tseo o ka nkarabang ka tsona, ke utlwe le seo o ka mpolellang sona.

⁶ Na o tla ntwantsha ka matla wohle a wona? Tjhe, le hanyenyane! o tla nkela hloko feela.

⁷ Moo, ya lokileng o ne a ka tseka le yena; ke be ke tla lokoloha ka ho sa feleng ho moahlodi wa ka!

⁸ Empa, bonang, ha nka ya nqa botjhabela, o siyo teng; leha ke tswela bophirimela, ha ke o fumane;

⁹ leha o ka sebetsa leboya, ha ke o fihlele; leha o ka ipata borwa, ha ke o bone.

¹⁰ Athe o tseba tsela ya ka; le hoja o ka nteka, ke ne ke tla tswa ke hlwekile jwaloka kgauta.

¹¹ Leoto la ka le tiile mehlaleng ya wona; ke bolokile tsela ya wona; ha ke a ka ka kgeloha ho yona.

¹² Melao ya melomo ya wona ha ke a ka ka e fapoha; ke bolokile ditaba tsa molomo wa wona sefubeng sa ka.

¹³ Leha ho le jwalo, o na le kgopolo e le nngwe feela; ke mang ya ka o reteletsang? Seo moya wa wona o se ratang, o a se etsa.

¹⁴ O tla phetha taba eo o ntaoletseng yona; ditaba tse jwalo di sa le ngata ka ho wona.

¹⁵ Ke ka baka leo ke thothomelang pela wona; ha ke hopola, ke o tshohe hampe.

¹⁶ Hobane Modimo o fokodisitse pelo ya ka, Ya matla wohle o ntshositse.

¹⁷ Hobane ha o a ka wa ntlosa lefifi le eso ho tle, mme ha o a ka wa pata botsho mahlong a ka.