Jobo 17 - Sesotho 1909/1961 (SO)

¹ Phefumoloho ya ka e a timela, matsatsi a ka a tima, lebitla le nkemetse.

² Efela basomi ba nteetse hare, mme mahlo a ka a bona dihlohloletso tsa bona.

³ Ako mpeele selebeletso bakeng sa ka; hobane ke mang ya ka nkemelang a ntshwere ka letsoho?

⁴ Hobane dipelo tsa bona o di kwaletse kutlwisiso; ka baka leo, o ke se ke wa ba phahamisa.

⁵ Ya ekang motswalle wa hae, mahlo a bana ba hae o tla a bona a timilwe.

⁶ O mpeile sesomo hara batho; ke fetohile ntho e nyatsehang pela bona.

⁷ Dillo di thibile mahlo a ka, ditho tsohle tsa ka ke seriti feela.

⁸ Ba lokileng ba maketse ke hoo, ba se nang molato ba halefela ba bolotsana.

⁹ Leha ho le jwalo, ya lokileng o tiisetsa tseleng ya hae, ya nang le matsoho a masweu o eketsa ho ipha matla.

¹⁰ Haele ka lona kaofela, kgutlang hle, le boye; nke ke ka bona motho ya hlalefileng hara lona.

¹¹ Matsatsi a ka a fetile, merero ya ka eo ke e hopotseng pelong ya ka, merero ya ka e wele fatshe.

¹² Bosiu ba re ke motshehare; lesedi ba re ke motshehare; lesedi ba re le haufi, ha le phirimile.

¹³ Jwale, ke tadimile nqalo ya bafu hoba e tla ba ntlo ya ka; ke adile diphate tsa ka nqalong e lefifi.

¹⁴ Ke re ho lebitla: O ntate! le ho diboko: Le mme le ngwaneso!

¹⁵ Mme jwale, tshepo ya ka e kae? E tla bonwa ke mang e hlahile?

¹⁶ E tla theohela dikgorong tsa nqalo ya bafu, moo re ya robala hammoho leroleng.