Jobo 15 - Sesotho 1909/1961 (SO)

Phetolo ya bobedi ya Elifase.

¹ Elifase wa Themane a fetola, a re:

² Na motho ya bohlale a ka araba ka ditaba tsa lefeela na? Na fuba sa hae se tletse moya wa botjhabela na?

³ Na diphetholo tsa hae e ka ba mantswe a sa reng letho, le dipolelo tsa hae na di ka hloka thuso na?

⁴ Ho tshaba Modimo ho wena ke lefeela; mme o fedisa thapelo e etswang ho wona.

⁵ Hobane bokgopo ba hao bo disa molomo wa hao, leha o nkile puo ya diqweleqwele;

⁶ molomo wa hao ke wona o o tswang, e seng nna; melomo ya hao ke dipaki tse o qosang.

⁷ Na ke wena motho ya tswetsweng pele? Na o hlahile dithaba di eso ho be teng na?

⁸ Na o rutehile makunutu a Modimo, mme o ikgapetse bohlale o le mong na?

⁹ O tseba taba efe eo re sa e tsebeng? O utlwisisa taba efe eo re sa e utlweng?

¹⁰ Ba bang ba teng hara rona, batho ba baholo, ba moriri o moputswa, ba fetang ntatao ka dilemo.

¹¹ Na o nyedisa matshediso a Modimo, le puo tse bonolo tse buwang ho wena na?

¹² Pelo ya hao e o isa kae na? O tona mahlo a hao keng,

¹³ ha o tsohela Modimo bohale, ha molomo wa hao o ntsha dipolelo tse jwalo?

¹⁴ Motho keng, hore a hlweke, le ya tswetsweng ke mosadi keng, hore a loke?

¹⁵ Bona, ha esitile bahalaledi ba wona o sa ba tshepe, le lehodimo le sa hlweka mahlong a wona;

¹⁶ haholoholo o ka sitwa ho tshepa motho ya manyala, ya senyehileng, ya nwang bokgopo jwaloka metsi.

¹⁷ Ke tla o ruta, o mmamele; ke tla o bolella seo ke se boneng;

¹⁸ e leng se bolelwang ke ba bohlale, seo ba sa kang ba se pata, kamoo ba se nkileng kateng, ho bontata bona;

¹⁹ e leng bao naha e neng e le ya bona, ho seng moditjhaba ya kileng a kena hara bona.

²⁰ Motho ya bolotsana o tshwenyeha ka matsatsi wohle a ho phela ha hae; motubi o phela ka tsietsi ka dilemo tsohle tsa hae;

²¹ mokgosi o duma ditsebeng tsa hae, mme leha ho sa iketlilwe, o hla a bona mosenyi ya mo welang hodimo!

²² O tshaba ho tswa lefifing; lerumo le mo laletse.

²³ O lelerela bohobe, o re: Bo kae? O tseba hobane tshiu e ntsho e mo atametse.

²⁴ O tshoswa ke tsietsi le ke mahlomola, di mo tshwere jwaloka morena ya itokiseditseng ho futuha.

²⁵ Hobane o otlolotse letsoho la hae ho lwantsha Modimo, o phephetsa Ya matla wohle;

²⁶ o o nehella ka molala o sataletseng, tlasa mokokotlo wa thebe ya hae;

²⁷ o ikwahetse sefahleho ka ho nona ha hae, o bokeletse mafura lethekeng la hae;

²⁸ o ikgaheletse metseng e senyehileng, matlung a se nang baahi, a leng lekgatheng la ho fetoha dithako.

²⁹ A ke ke a rua, maruo a hae a ke ke a sala, mafumo a hae a ke ke a aparela lefatshe.

³⁰ Ha a tla ke a sesefa lefifi; mollo o tla tjhesa makala a hae, o tla tloswa ke pudulo ya molomo wa wona.

³¹ Leha a ka itshepisa ka bobe, o tla thetseha, etswe moputso wa hae e tla ba bobe.

³² Dilemo tsa hae di eso ho fele, bo tla etsahala; makala a hae ha a sa tla hlola a eba matala.

³³ O jwaloka sefate sa morara se lahlang ditholwana tsa sona di sa le tala, le jwaloka mohlwaare o hlohlorang dipalesa tsa wona.

³⁴ Hobane ntlo ya e mobe e tla nyopa, mme mollo o tla ja moaho wa ya kgopo.

³⁵ O emola maswabi, o tswala bokgopo; sefubeng sa hae ho sebetswa boithetso.