Jobo 12 - Sesotho 1909/1961 (SO)

Jobo o ikarabela hape.

¹ Jobo a boela a fetola, a re:

² Kannete, lona le banna! mme bohlale bo ya shwa le lona?

³ Le nna hle ke na le pelo jwaloka lona, ha ke monyenyane ho lona! Ditaba tseo, ke mang ya sa di tsebeng na?

⁴ Ke fetohile sesomo ho metswalle ya ka, ha ke kopa thuso ho Modimo; e, ke sesomo ke le ya lokileng, ya se nang molato.

⁵ Bomadimabe bo loketswe ke nyediso, ha ho hopola baiketli; o lebeletse eo leoto la hae le batlang ho thella.

⁶ Boiketlo bo ditenteng tsa basenyi, kgotso e teng ho ba sa reng letho ka Modimo, bao matla a bona e leng modimo wa bona.

⁷ O mpe o botse dikgomo, di tle di o rute; le dinonyana tsa lehodimo, di tle di o bolelle!

⁸ Mohlomong o botse lefatshe, le tle le o rute, le dihlapi tsa lewatle, di tle di o qaqisetse.

⁹ Ka tsona tsohle, ke mang ya ka hanang ho bona hoba letsoho la Jehova le entse ntho tseo kaofela;

¹⁰ eo meya ya tse phelang kaofela e leng letsohong la hae, le phefumoloho ya batho bohle?

¹¹ Ha ke re, tsebe e ka nna ya kgetha dipolelo, jwaloka mahalapa ha a tseba ho kgetha dijo na?

¹² Maqheku a na le bohlale, dilemo tse ngata di na le kutlwisiso.

¹³ Ho wona Modimo ho dutse bohlale le matla; o na le kelello le kutlwisiso.

¹⁴ Bona, ha o senya, ha ho ya ka tsosang; ha o ka kwalla motho, ha ho ya ka mo bulelang.

¹⁵ Bona, o thibela metsi, a pshe; o boele o a tlohele, mme lefatshe le senyehe.

¹⁶ Ho wona ho dutse matla le bohlale; ya kgelohileng le ya kgelosang ba matleng a wona.

¹⁷ O isa baeletsi kgolehong ba hlobodisitswe, o tsietsa baahlodi;

¹⁸ o roba molamu wa marena, o tlama matheka a wona ka mehala.

¹⁹ O isa baprista kgolehong ba hlobodisitswe, o diha ba matla;

²⁰ ba tsebang ho bua o ba hlokisa ditaba, o amoha baholo kahlolo;

²¹ o tshela dihlong hodima mahosana, o lokolla senyepa sa ba matla.

²² O senola makunutu a patilweng lefifing; o hlahisa moriti wa lefu leseding.

²³ O atisa ditjhaba, o boele o di senye; o namisa ditjhaba, o boele o di kgutlisetse morao.

²⁴ O tlosa kutlwisiso ho marena a ditjhaba; o ba dikadikisa dibakeng moo tsela e leng siyo;

²⁵ ba phopholetsa lefifing ho se lesedi, mme o ba diadieisa jwaloka batho ba tahilweng.