Jobo 11 - Sesotho 1909/1961 (SO)

Phetolo ya pele ya Tsofare.

¹ Yaba Tsofare wa Naama o fetola, a re:

² Bongata bo bokalo ba mantswe na bo ka hloka phetolo na? Motho ya lehehle na o tla re, o lokile na?

³ Na taba tsa hao tsa lefeela di tla kgutsisa banna na? Na o tla nne o some, ho se ya o hlabisang dihlong?

⁴ O re: Seo ke se bolelang ke nnete, mme ke hlwekile pela hao!

⁵ Hola Modimo o mpa o ne o ka bua, wa ahlamisa molomo wa wona ho bua le wena,

⁶ ho o senolela diphiri tsa bohlale ba wona, bo tebileng, bo fetang kutlwisiso ya rona, o ka be o bona hoba bakeng sa hao Modimo o lebetse boholo ba sebe sa hao.

⁷ Na o ka fihlela ditaba tse tebileng tsa Modimo na? Na o ka utlwisisa bophethehi ba Ya matla wohle na?

⁸ Bo phahame jwaloka lehodimo: o ka etsang? Bo tebile ho fetisa nqalo ya bafu: o ka tsebang?

⁹ Bolelele ba bona bo fetisa lefatshe, bo pharaletse ho feta lewatle.

¹⁰ Ha o ka phalla, wa tshwara, wa isa kahlolong, o tla thibelwa ke mang na?

¹¹ Hobane o tseba bolotsana ba batho, o bona bobe leha o sa bo hlokomele.

¹² Empa motho ya se nang kutlwisiso, o sitwa ho fihlela kelello, o hlahile jwaloka petsana ya pitsi.

¹³ Empa ha o ka hleka pelo ya hao hantle, mme wa otlollela matsoho a hao ho wona,

¹⁴ ha o ka suthisa bobe pela hao, wa bo hlohlorela hole, o sa lese bokgopo bo ikgahela tenteng ya hao,

¹⁵ etlaba moo o tsebang ho emisa hlooho ya hao o se na sekodi; o tla tiya o sa tshabe letho.

¹⁶ O tla lebala bohloko ba hao, o bo elellwe jwaloka metsi a fetileng;

¹⁷ bophelo ba hao bo tla ela ka lesedi le fetang la motshehare; leha ho ka ba lefifi, mafube a tla boela a hlahe;

¹⁸ o tla tiya pelo, hobane tshepo e tla ba teng; moo o neng o hloreha, o tla robala ka boiketlo;

¹⁹ phomolong o ke ke wa kgathatswa, ba bangata ba tla phaphatha sefahleho sa hao.

²⁰ Empa mahlo a ba bolotsana a tingwa, ba hloka setshabelo; tshepo e ba saletseng ke ho neela moya.