Genese 11 - Sesotho 1909/1961 (SO)

Tora ya Babele.

¹ Lefatshe lohle le ne le na le puo e le nngwe le mantswe a le mang.

² Yare ha ba fallela Botjhabela, ba fihlela lehwatata naheng ya Shineare, mme ba aha teng.

³ Yaba ba bolellana, ba re: Tloong hleng, re bope makote, re a bese ka mollo. Ba eba le makote bakeng sa majwe, le bitume bakeng sa seretse.

⁴ Jwale ba re: Tloong jwale, re ikgahele motse le tora, hloro ya yona e fihle lehodimong, mme re iketsetse lebitso, re tle re se ke ra qhalanyetswa lefatsheng lohle.

⁵ Yaba Jehova o theoha ho tla bona motse le tora e hahuwang ke bana ba batho.

⁶ Jehova a re: Bonang, ke setjhaba se le seng, puo ya bona kaofela e nngwe feela, mme haele mona ba qadile ho sebetsa, ha ba sa na ho thibelwa hore ba se ke ba phetha tsohle tseo ba di rerileng.

⁷ A re theoheng he, re ferekanye puo ya bona hona teng, hore e mong a se ke a utlwa puo ya e mong.

⁸ Yaba Jehova o ba qhalanya teng jwalo, ba ya le lefatshe lohle, ba lesa ho haha motse.

⁹ Ka baka leo, motse oo wa rewa Babele, kahobane ke moo Jehova a ferekantseng teng puo ya lefatshe lohle, le moo Jehova a ba qhalanyeditseng teng lefatsheng lohle.

Bontatemoholo ba setjhaba sa Baiseraele ho tloha ho Abrahama ho isa ho Josefa, 11:10 — 50:26. Lesika la Sema.

¹⁰ Ditloholo tsa Sema ke tsena: Sema e ne e le motho ya dilemo tse lekgolo, mme a tswala Arpaksade, ka lemo sa bobedi ha morwallo o se o fetile.

¹¹ Sema eitse hobane a tswale Arpaksade, a phela dilemo tse makgolo a mahlano; mme a tswala bara le baradi.

¹² Arpaksade a phela dilemo tse mashome a mararo a metso e mehlano, a tswala Shela.

¹³ Arpaksade eitse hobane a tswale Shela, a phela dilemo tse makgolo a mane a metso e meraro; mme a tswala bara le baradi.

¹⁴ Shela a phela dilemo tse mashome a mararo, a tswala Hebere;

¹⁵ mme Shela ha a se a tswetse Hebere a phela dilemo tse makgolo a mane a metso e meraro; mme a tswala bara le baradi.

¹⁶ Hebere a phela dilemo tse mashome a mararo a metso e mene, a tswala Pelege;

¹⁷ mme Hebere ha a se a tswetse Pelege, a phela dilemo tse makgolo a mane a mashome a mararo; mme a tswala bara le baradi.

¹⁸ Pelege a phela dilemo tse mashome a mararo, a tswala Rehu;

¹⁹ mme Pelege eitse hobane a tswale Rehu, a phela dilemo tse makgolo a mabedi a metso e robileng mono o le mong; mme a tswala bara le baradi.

²⁰ Rehu a phela dilemo tse mashome a mararo a metso e mmedi, a tswala Seruge;

²¹ mme Rehu ha a se a tswetse Seruge, a phela dilemo tse makgolo a mabedi a metso e supileng; mme a tswala bara le baradi.

²² Seruge a phela dilemo tse mashome a mararo, a tswala Nakore;

²³ mme Seruge eitse hobane a tswale Nakore, a phela dilemo tse makgolo a mabedi; mme a tswala bara le baradi.

²⁴ Nakore a phela dilemo tse mashome a mabedi a metso e robileng mono o le mong, a tswala Tera;

²⁵ mme Nakore eitse hobane a tswale Tera, a phela dilemo tse lekgolo le leshome le metso e robileng mono o le mong; mme a tswala bara le baradi.

²⁶ Tera a phela dilemo tse mashome a supileng, mme a tswala Abrame, Nakore le Harane.

²⁷ Ditloholo tsa Tera ke tsena: Tera a tswala Abrame, Nakore le Harane; Harane a tswala Lota.

²⁸ Empa Harane a shwa, Tera ntatae a sa ntse a le teng, lefatsheng leo a tswaletsweng ho lona, Ure wa Kalde.

²⁹ Abrame le Nakore ba inkela basadi; lebitso la mosadi wa Abrame e le Sarai, lebitso la mosadi wa Nakore e le Milka, moradi wa Harane, ntata Milka le Jiska.

³⁰ Empa Sarai e ne e le nyopa, a se na ngwana.

³¹ Tera a nka mora hae Abrame, le setloholo sa hae Lota, mora Harane, le ngwetsi ya hae Sarai, mohatsa Abrame, mora hae; mme ba tswa Ure wa Kalde ho ya lefatsheng la Kanana. Ba fihla Kharane, ba aha teng.

³² Ditshiu tsa Tera ya eba dilemo tse makgolo a mabedi a metso e mehlano; Tera a ntoo shwela Kharane.