Diproverbia 8 - Sesotho 1909/1961 (SO)

¹ Ana bohlale ha bo howe na? Le kutlwisiso ha e phahamise lentswe la yona na?

² Bo eme diphahameng, le ditseleng, le mapatlelong.

³ Ba howa kgotla, pela dikgoro tsa motse, le hara mapatlelo;

⁴ bo re: Helang! batho ba baholo, ke bitsa lona, mme lentswe la ka le batla lona, bana ba batho.

⁵ Oho! lona dithoto, ithuteng masene; le lona mawatla, le batle kutlwisiso.

⁶ Mamelang, hoba ke tla bua tse kgolo, melomo ya ka e hlahise tse lokileng.

⁷ Hobane leleme la ka le bolela nnete; bokgopo bo manyala molomong wa ka.

⁸ Dipolelo tsohle tsa molomo wa ka di lokile: ho tsona ha ho na letho le sokameng, le kgelohileng.

⁹ Tsohle ke tse utlwahalang ho motho ya nang le kelello, di lokile ho ya fumaneng tsebo.

¹⁰ Amohelang thuto ya ka ho fetisa silefera, le tsebo ho fetisa kgauta e hlwekileng.

¹¹ Hobane bohlale ke ntho ya bohlokwa ho fetisa diperela, mme tsohle tse hlokolotsi ha di na le ho bapiswa le bona.

¹² Nna, bohlale, ke ahisane le masene; tsebo ya dikelello tsa hlalefo e fihlelwa ka nna.

¹³ Ho tshaba Jehova ke ho hloya bobe. Ke hloile boikgantsho le boikgohomoso, motsamao o mobe le molomo o kgopo;

¹⁴ keletso le hlalefo ke tsa ka, le wona masene le matla a ho nna.

¹⁵ Ke ka nna marena a renang; esale ka nna mahosana a laelang ka ho loka.

¹⁶ Babusi ba busa ka nna; ho jwalo le baholo le baahlodi bohle ba lefatshe.

¹⁷ Ke rata ba nthatang; ba mpatlang e sa le kameso, ba tla mphumana.

¹⁸ Menono le hlompho di ho nna, maruo a sebele le hona ho loka.

¹⁹ Tholwana ya ka e monate ho fetisa kgauta, leha e ka ba kgauta e hlwekileng; tse kotulwang ho nna di feta silefera e hlwekileng.

²⁰ Ke tsamaisa motho tseleng ya ho loka le mmileng o tatametseng.

²¹ Ke ruisa ba nthatang mafa a dintho tse sa feleng, ke tlatsa dipolokelo tsa bona.

²² Jehova o mpopile ho qaleng ha ditsela tsa hae, mesebetsi ya hae e eso ho be teng, boholoholo.

²³ Ke beilwe borena mehla e eso ho qalehe, lefatshe le eso ho ka le eba teng.

²⁴ Ka hlahiswa mawatle a sa le siyo, le tsona didiba tse kollang metsi a mangata.

²⁵ Ke hlahile dithaba di eso ho ka di thewa, le maralla a sa le siyo;

²⁶ Jehova a eso ho etse lefatshe, le dinaha, leha e le tholenyana ya lerole la lefatshe.

²⁷ Mohla a lokisang mahodimo, ke ne ke le teng; mohla a dikadiketsang lewatle ka moedi;

²⁸ mohla a tiisang maru hodimo; mohla a bilosang mehlodi ya madiba;

²⁹ le mohla a laelang lewatle hore metsi a lona a se ke a tlola lebopo; le mohla a lekanyang metheo ya lefatshe.

³⁰ Mehleng eo, ke ne ke le motlatsi wa hae, ke thabile ka matsatsitsatsi, ke nyakaletse pela sefahleho sa hae kamehla;

³¹ ke ne ke thabela lefatshe la ho aha ha batho; ke thabela le bana ba batho.

³² Jwale, bana, nkutlweng! Ho lehlohonolo ba yang ka tsela tsa ka.

³³ Mamelang thuto, le tle le hlalefe, le se ke la e kgeloha.

³⁴ Ho lehlohonolo motho ya nkutlwang, ya lebelang menyako ya ka ka metsotso yohle, ya fadimehang mathuleng a monyako wa ka.

³⁵ Hobane ya mphumanang o fumane bophelo, mme o tla bona mohau ho Jehova.

³⁶ Empa ya ntshikolohang o senya moya wa hae; bohle ba ntlhoileng ba rata lefu.