Diproverbia 31 - Sesotho 1909/1961 (SO)

¹ Dipolelo tsa morena Lemuele: kgothatso tseo mmae a kileng a mo ruta tsona.

² Keng, mora wa ka! keng, mora wa mpa ya ka! Oho ke tla reng, ngwana wa dikano tsa ka?

³ Se neele basadi matla a hao, se latele basadi ba timetsang marena.

⁴ Hase marena, Lemuele, hase marena a loketseng ho rata veine, leha e le mahosana ho lakatsa jwala bo tahang;

⁵ esere mohlomong ba lebala molao, mme ba fosisa nyewe ya motshwenyehi e mong le e mong.

⁶ Jwala bo tahang le bo nee motho ya ya timela, le veine le e nose motho ya pelo e hlomohileng;

⁷ hore a nwe, a lebale bofumanehi ba hae, a se ke a hlola a hopola bomadimabe ba hae.

⁸ Molomo wa hao o o ahlamisetse semumu, mme o emele nyewe tsa bohle ba lahlilweng.

⁹ Ahlamisa molomo, o ahlole ka ho loka, o ahlolele ya madimabe le mofutsana.

¹⁰ Mosadi ya kgabane ke mang ya tla mo fumana? Ke ya bohlokwa ho fetisa diperela hole.

¹¹ Pelo ya monna wa hae e a mo tshepa, mme a ke ke a hlokiswa leruo.

¹² O mo etsa hantle, e seng hampe, ka matsatsi wohle a ho phela ha hae.

¹³ O ipatlela boya ba dinku le lene, mme o sebetsa ka matsoho ka thabo.

¹⁴ O tshwana le dikepe tsa mohwebi, o lata bohobe ba hae hole.

¹⁵ O tsoha e sa le bosiu, o abela ba ntlo ya hae dijo, le makgabunyane a hae mesebetsi.

¹⁶ O kgahlwa ke tshimo, a ye a e reke; ka tseo a di sebeleditseng, o hloma tshimo ya merara.

¹⁷ O itlama letheka ka matla, mme o matlafatsa matsoho a hae.

¹⁸ O thabela leruo la mahlahahlaha a hae; le bosiu lebone la hae ha le time.

¹⁹ Matsoho a hae a tshwara thupa ya ho ohla, menwana ya hae e tsamaisa thupa e etsang ditshwele.

²⁰ O fuparollela bafumanehi seatla sa hae, o se otlollela mohloki.

²¹ Ha a tshohe lehlwa bakeng sa ba ntlo ya hae, hobane ba ntlo ya hae bohle ba apere dikobo tse futhumetseng.

²² O itohela diphate tse ntle; ho apara ha hae ke lene le sekarelata.

²³ Monna wa hae o tsejwa kgorong ya motse, ha a dutse hara banna ba baholo ba setjhaba.

²⁴ O etsa masela a lene, o rekisa ka wona, le dinyepa o rekisa ka tsona ho mohwebi.

²⁵ Matla le hlompho ke seaparo sa hae, o tsheha letsatsi la hosasane.

²⁶ O ahlamisa molomo wa hae ka bohlale, molao o mosa o lelemeng la hae.

²⁷ O alosa ntlo ya hae, ha a je bohobe ba botswa.

²⁸ Bara ba hae ba tsoha, mme ba mmitsa ya lehlohonolo. Monna wa hae le yena o a mo rorisa,

²⁹ o re: Baradi ba bangata ba bile kgabane, empa wena, o ba feta bohle.

³⁰ Kgahleho e a thetsa; botle ke bosawana! Mosadi ya tshabang Jehova ke yena ya tla roriswa.

³¹ A ke a je tholwana tsa matsoho a hae, mme mesebetsi ya hae e mo rorise kgorong tsa motse.