Diproverbia 27 - Sesotho 1909/1961 (SO)

¹ O se ke wa ithorisa ka letsatsi la hosasane, hobane ha o tsebe se tla hlahiswa ke letsatsi leo.

² Ya o rorisang e be e mong, e seng leleme la hao; e be osele ho wena, e seng molomo wa hao.

³ Lejwe le boima, le lona lehlabathe, empa hlonamo ya lehlanya e di feta tse pedi.

⁴ Bohale bo soro, hlonamo ke ho tlala ha noka; haele lefufa, ke mang ya tla ema pela lona?

⁵ Kgalemelo ya pepeneneng e ntle ho feta lerato le patwang.

⁶ Maoma a etswang ke motswalle a tshepeha, empa dikako tsa ba o hloileng di a tshabeha.

⁷ Motho ya kgotsheng o hatakela dinotshi ka maoto; empa ya lapileng, se babang se monate ho yena.

⁸ Motho ya furaletseng hae ha hae, o jwaloka nonyana e lelerang hole le ntlo ya yona.

⁹ Ole le tse nkgang hamonate di thabisa pelo, ho jwalo keletso e tswang pelong ya motswalle ya mosa.

¹⁰ O se ke wa furalla motswalle wa hao, leha e le motswalle wa ntatao; mme o lese ho ya ha ngwaneno mohla o leng tsietsing. Eo le ahisaneng hammoho le yena o feta ngwaneno ya leng hole.

¹¹ Mora wa ka, hlalefa, o nthabise pelo, mme ke tla ba le puo ho fetola ba nkomanyang.

¹² Motho ya pelokeletsi o bonela kotsi pele, mme o a itshireletsa; mawatla a feta feela, mme a hlahelwa ke tsietsi.

¹³ Mo amohe kobo, hobane o itlamile ka molato wa e mong; mo ntshise tebeletso ya melato ya basele.

¹⁴ Ya rorisang motswalle wa hae e sa le kameso ka lentswe le phahameng, ba ya re, o a mo hlapaola.

¹⁵ Metsi a rothang dintshing tsa marulelo a ntlo, a sa kgaotse mohla sekgohola, le mosadi ya dikomang, ke ntho e le nngwe.

¹⁶ Ya ka lekang ho mo phoka, a ka kgutsisa moya; letsoho la hae le letona le ka tshwara ole.

¹⁷ Tshepe e leotsa tshepe; sefahleho sa motho se leotsa sefahleho sa motswalle wa hae jwalo.

¹⁸ Ya disang sefate sa feiye o tla ja tholwana ya sona, ya bolokang monga hae hantle o tla hlomphuwa.

¹⁹ Jwalokaha sefahleho se iponang metsing se tshwana le sefahleho, pelo ya motho e tshwana jwalo le pelo ya motho e mong.

²⁰ Nqalo ya bafu le dihele ha di na ho kgora, mahlo a motho le wona ha a kgore.

²¹ Pitsa ya lesehla e qhibidisa silefera, sebopi se bedisa kgauta; motho a leke jwalo molomo o mo rorisang.

²² Leha o ka tulela lehlanya ka mokgobo, wa le sila ka tshilo le mabele a silwang, le teng bohlanya bo ke ke ba le tlohela.

²³ O lekole dinku tsa hao hantle, mme o hlahlobe mohlape wa hao hantle.

²⁴ Hobane nala hase ya kamehla, le borena ha bo hlolehe kamehla le mehla.

²⁵ Jwang bo a bokellwa, botala bo a hlaha, mme ho latwa jwang dithabeng;

²⁶ dikonyana di tla o apesa, diphooko di o rekele tshimo,

²⁷ mme lebese la dipodi e tla ba dijo tsa hao, le tsa ntlo ya hao, le tsa makgabunyane a hao.