Diproverbia 26 - Sesotho 1909/1961 (SO)

¹ Jwaloka lehlwa ha le sa tshwanele lehlabula, leha e le pula mohla kotulo, le yona hlompho ha e lokele lehlanya.

² Jwaloka nonyana ha e fofafofela mona le mane, le lefokotsane ha le okaokela feela, ho jwalo thohako ya lefeela, ha e sebetse letho.

³ Pere e lokelwa ke phafa, le esele ke tomo; mokokotlo wa lehlanya le wona o lokelwa ke thupa.

⁴ O se ke wa fetola lehlanya ka bohlanya ba lona, esere mohlomong le wena wa tshwana le lona.

⁵ O fetole lehlanya ka tsa bohlanya ba lona, esere mohlomong la ipona bohlale mahlong a lona.

⁶ Ya romelang ditaba ka lehlanya o ikgaola maoto, o inwella tshenyo.

⁷ Jwalokaha maoto a sehole a leketla feela, polelo ya bohlale e jwalo melomong ya mahlanya.

⁸ Ho rorisa lehlanya ke ho tlamella lejwana ka letjeketjaneng.

⁹ Polelo ya bohlale molomong wa lehlanya e jwaloka meutlwa letsohong la letahwa.

¹⁰ Motho ya tholang lehlanya le basebi, o jwaloka mohlabani ya hlabang bohle.

¹¹ Jwaloka ha ntja e boela mahlatseng a yona, lewatla le boela jwalo bowatleng ba lona.

¹² Ana o bone motho ya iponang bohlale? Lehlanya le tshepisa ho fetisa eo.

¹³ Sekgoba se re: Tau e rorang e teng tseleng, tau e bohale e mabaleng.

¹⁴ Lemati la monyako le iphetola mahokelong a lona, le motswafi diphateng tsa hae.

¹⁵ Sekgoba se isa letsoho ho ngwatha lefisong; empa se tswafa ho le busetsa molomong.

¹⁶ Sekgoba se ipona bohlale ho fetisa ba supileng ba arabang ka masene.

¹⁷ Mofetakatsela ya kenang komang tsa ba bang ka bohale, o tshwara ntja ka ditsebe.

¹⁸ Ya thetsang wa habo o tshwana le motho ya soro, ya betsang dirumula le metsu le lefu,

¹⁹ a re: Na ke ne ke sa bapale na?

²⁰ Mollo o tima ke ho hlokeha ha patsi; ho jwalo dikomang, di fela ha mosebi a le siyo.

²¹ Mashala a matsho a etsa mashala a hlenneng, patsi e hotetsa mollo; ho jwalo motho ya dikomang, o tukisa dikgang.

²² Dipolelo tsa mosebi di ka dijo tse hlabosang, di kena di tebela hare ka maleng.

²³ Melomo e tukang le pelo e mpe, di jwaloka lelwapi la silefera le manehilweng hodima pitsa ya letsopa.

²⁴ Ya hloyang o ikgakanya ka melomo ya hae, mme ka pelong o rera thetso;

²⁵ leha a bua ka mosa, o se ke wa kgolwa ke yena, hobane manyala a supileng a ka pelong ho yena.

²⁶ Hloyo e ipata ho ikgakanyeng, empa bolotsana ba yona bo tla senolwa pitsong.

²⁷ Ya tjhekang lemena o tla wela teng, mme lejwe le tla boela hodima ya le thetang.

²⁸ Leleme le leshano le hloile ba hlabilweng ke lona, mme molomo o qekisang o hlahisa tshenyeho.