Diproverbia 25 - Sesotho 1909/1961 (SO)

¹ E sa le tsona dipolelo tsa Salomone tse ngodilweng ke batho ba Esekiase, morena wa Juda.

² Kganya ya Modimo ke ho bea ditaba sephiring, empa ho di batlisisa ke kganya ya marena.

³ Ho phahama ha lehodimo le ho teba ha lefatshe, le dipelo tsa marena, ha di na ho fuputswa.

⁴ Ha o tlosa manya silefereng, lelala le tla etsa pitsa ka yona;

⁵ ha o tlosa molotsana pela morena, terone ya hae e tla tiiswa ke ho loka.

⁶ O se ke wa ikakasa pela morena, o se ke wa dula ditulong tsa ba baholo.

⁷ Hobane ho ka ba hotle ha ho ka thwe ho wena: Nyolohela mona; e seng hore ba o kokobetse pela morena eo o mmonang ka mahlo.

⁸ O se ke wa phaka wa ya nyeweng, esere mohlomong qetellong wa kena tsietsing, ha o se o hlotswe ke wa heno.

⁹ Leha o tseka le wa heno, o se ke wa phunya lekunutu la e mong,

¹⁰ esere mohlomong ya utlwang a o nyatsa, a o apesa ka dihlong tse o kgomarelang.

¹¹ Polelo e builweng ka motsotso o tshwanelehang, e jwaloka diapole tsa kgauta pitsaneng ya silefera.

¹² Monyatsi ya hlalefileng, ditsebeng tsa motho ya utlwang, o jwaloka lesale la kgauta, le lepetu la kgauta e hlwekileng.

¹³ Lenqosa le tshepehang ho ba le romileng, le jwaloka lehlwa le tsedidi mohla kotulo, le phodisa pelo ya morena wa lona jwalo.

¹⁴ Ya ithorisang ka ho fana ha leshano, o jwaloka maru le moya o fokang, pula e le siyo.

¹⁵ Morena o hlolwa ka sebete, mme leleme le bonolo le roba masapo.

¹⁶ Na o fumane dinotshi? O di je ka tekano, esere mohlomong wa tenwa, mme wa di hlatsa.

¹⁷ O se ke wa itlwaetsa haholo lapeng le wa heno, esere mohlomong a tenwa ke wena, a ba a o hloya.

¹⁸ Motho ya pakang leshano ho senya wa habo, ke molamu, le lerumo, le motsu o ntjhotjho.

¹⁹ Molotsana eo o mo tshepileng mohla tsietsi, ke leino le robehileng le leoto le tetemang.

²⁰ Ho hlobola kobo mohla ho hatsetseng, le ho tshela asene ka letobola, ke ho hlabela pelo e hlomohileng dipina tsa menyaka.

²¹ Ekare ha sera sa hao se lapile, se fe ho ja bohobe; ha se nyorilwe, o se nee metsi, se nwe;

²² e tla ba mashala a hlenneng ao o a bokellang hloohong ya sona, mme Jehova o tla o putsa.

²³ Moya wa leboya o hlahisa pula, mme leleme le sebang le hlahisa sefahleho se halefileng.

²⁴ Ho ikahela ntlheng ya marulelo a ntlo, ho molemo ho ena le ho dula ka tlung e kgolo le mosadi ya omanang.

²⁵ Taba tse monate tse tswang naheng e hole, di jwaloka metsi a phodileng ho motho ya nyorilweng.

²⁶ Sediba se dukehileng, le mohlodi o katehileng, di ka motho ya lokileng ya tetemang pela moetsadibe.

²⁷ Ho kgora dinotshi tse ngata hampe ha ho monate; ho jwalo ba ipatlelang hlompho, ba imelwa ke yona.

²⁸ Motho ya hlolwang ke ho busa pelo ya hae, ke motse o kenweng ke dira, o se nang lerako.