Diproverbia 23 - Sesotho 1909/1961 (SO)

¹ Ha o dula ho ya le morena, lemohisisa se beilweng pela hao;

² o ikgaole mmetso ka thipa, ha o hlotswe ke ho lapa.

³ Se lakatse dijo tsa hae tse hlabosehang; ke bohobe bo thetsang.

⁴ O se ke wa ikgathatsa ho bokella leruo; tlohela kgopolo ya teng.

⁵ O le tadimelang, haele moo le tla feta kapele? Le tla mela mapheo ruri, le rurele hodimo jwaloka ntsu.

⁶ O se ke wa ja bohobe ba lekgonatha, o se ke wa lakatsa tse monate tsa lona.

⁷ Hobane kamoo le nahanang pelong ya lona kateng, le jwalo. Le tla re ho wena: Ja, o nwe; empa pelo ya lona ha e ho wena.

⁸ Mothamo oo o o jeleng o tla o hlatsa, mme dipolelo tse ntle tsa hao etlaba di lahlehile.

⁹ O se ke wa bua ha lewatla le utlwa, hobane le ka nyedisa hlalefo ya ditaba tsa hao.

¹⁰ O se ke wa suthisa mokolokotwane wa kgale, o se ke wa kena tshimong ya dikgutsana;

¹¹ hobane mophetetsi wa tsona o matla, o tla di emela, a di lwanele.

¹² Neela thuto pelo ya hao, o sekehele ditaba tsa bohlale ditsebe tsa hao.

¹³ Se time ngwana kgalemelo; leha o mo shapa ka thupa, a ke ke a shwa:

¹⁴ o tla mo shapa ka thupa e le wena, o lopolle moya wa hae nqalong ya bafu.

¹⁵ Moya wa ka, ha pelo ya hao e hlalefa, pelo ya ka le yona e tla thaba.

¹⁶ Mme ke tla nyakalla kahare ho nna, ha o bua ka ho loka ka melomo ya hao.

¹⁷ Pelo ya hao e se ke ya honohela ba babe, o mpe o hlole o tshaba Jehova kamehla,

¹⁸ hobane efela moputso o teng, mme tshepo ya hao e ke ke ya etswa lefeela.

¹⁹ Mamela, wena, mora ka, o hlalefe, o lebise pelo ya hao tseleng eo.

²⁰ O se ke wa tlwaela manwajwala le manyolonyolo;

²¹ hobane letahwa le lenyolonyolo ba ipakela bofuma; mme ho rata boroko ho apesa motho maharaswa.

²² Mamela ntatao ya o tswetseng, o se ke wa nyedisa mmao, ha a tsofetse.

²³ Rua nnete, o se ke wa rekisa ka yona, le bohlale, le thuto, le kelello.

²⁴ Ntata ya lokileng o tla nyakalla haholo; ya tswetseng ngwana ya bohlale o tla thaba ka yena.

²⁵ A a ke a thabe, ntatao, le yena mmao; a nyakalle, ya o belehileng.

²⁶ Ngwana ka, mphe pelo ya hao, mahlo a hao a kgahlwe ke tsela tsa ka.

²⁷ Hobane seraburabu ke lemena le tebileng, mme mosadi wa seotswa ke mokoti o patisaneng.

²⁸ O lalla monna jwaloka hoja ke phoofolo e tsongwang, mme o atisa dihlola hara banna.

²⁹ Bomadimabe ke ba mang na? Jo nna! Jo nna! ke tsa mang? Dikomang ke tsa mang? Dillo ke tsa mang? Maoma a feela ke a mang? Ke a mang mahlo a mafubedu na?

³⁰ Ke a ba qenehelang ho nwa, ba hlanyetsang veine e tswakilweng.

³¹ O se ke wa tadima veine ha e le kgubedu, ha e phophoma lefiswaneng, leha e theohela mmetsong hamonate.

³² Ho felleng, e loma jwaloka noha, e hlaba jwaloka marabe.

³³ Mahlo a hao a tla tadima diraburabu, mme pelo ya hao e tla bolela tse kgopo;

³⁴ o be jwaloka motho ya robetseng bodibeng ba lewatle, le jwaloka ya robetseng ntlheng ya sefate sa sekepe.

³⁵ Ke hona o tla re: Ba nkotlile, athe ha ke a ka ka utlwa bohloko, ba nkentse maoma, athe ha ke a ka ka tseba! ... ke tla tsoha neng, ke boele ke batle hoo hape?