Diproverbia 2 - Sesotho 1909/1961 (SO)

¹ Mora wa ka, etlere ha o amohela ditaba tsa ka, mme o ipolokela melao ya me ka ho wena,

² o e sekehela tsebe, mme o lebisa pelo ya hao kutlwisisong,

³ ke re, ha o ka bitsa masene, wa howeletsa kutlwisiso,

⁴ wa e batla jwaloka silefera, wa e rafa jwaloka matlotlo a patilweng mobung;

⁵ ke moo o tla tseba ho tshaba Jehova, o fihlele tsebo ya Modimo;

⁶ hobane Jehova ke yena ya fanang ka bohlale; tsebo le kutlwisiso di tswa molomong wa hae.

⁷ O bolokela ba lokileng poloko, ke thebe ho ba tsamayang ka ho loka.

⁸ O lebela mmila wa ho loka, o disa tsela ya bakgehtwa ba hae.

⁹ Jwale, o tla tseba ho loka le tshwanelo le bokgabane le mekgwa yohle e molemo.

¹⁰ Hobane bohlale bo tla kena pelong ya hao, tsebo e kgahlise moya wa hao;

¹¹ masene a o lebele, kutlwisiso e o boloke;

¹² ho o phemisa tsela ya bobe, ho o kelosa ho bao ba buang tse kgopo,

¹³ ba furaletseng tsela ya ho loka, ba tsamayang ka tsela ya lefifi,

¹⁴ ba thabelang bolotsana, ba iketekang ka diketso tse mpe;

¹⁵ bao ditsela tsa bona di kgelohileng, le metsamao ya bona e kgopameng;

¹⁶ o tle o namolelwe mosading wa letekatsi, mosading wa letekatsi, mosading wa seotswa ya qekisang ka dipolelo tsa hae,

¹⁷ ya furaletseng motswalle wa botjha ba hae, mme a lebetse selekane sa Modimo wa hae.

¹⁸ Ruri, ntlo ya hae e sekametse lefung, tsela tsa hae di isa bafung.

¹⁹ Ho ba yang ho yena, ha a yo ya kgutlang le ho boela a nka tsela ya bophelo.

²⁰ Ka baka leo, tsamaya ka mehlala ya batho ba molemo, u tiisetse tseleng ya ba lokileng;

²¹ hobane ba lokileng ba tla aha lefatsheng; ba hlwekileng ba tla le rua.

²² Empa ba babe ba tla kgaolwa hodima lefatshe, ba lonya ba fotholwe ho lona.