Diproverbia 12 - Sesotho 1909/1961 (SO)

¹ Ya ratang tayo o rata tsebo; haele ya hloileng kgalemelo, ke sethoto.

² Motho ya molemo o tla fumana mohau ho Jehova, empa o tla tswa ya merero e mebe.

³ Motho a ke ke a tiiswa ke bobe; haele motso wa ya lokileng, o ke ke wa ba wa sisinyeha.

⁴ Mosadi ya kgabane ke moqhaka ho monna wa hae; empa ya hlabisang dihlong o jwaloka ho bola masapong a hae.

⁵ Mehopolo ya ba lokileng e lokile, empa merero ya ba babe ke e thetsang.

⁶ Mantswe a ba babe ke mamena a ho tsholla madi; haele molomo wa ba lokileng, o a ba pholosa.

⁷ Ba babe ba dihuwa, eba ba se ba le siyo; empa ntlo ya motho ya lokileng e ya nne e eme.

⁸ Motho o tla roriswa ho lekana bohlale ba hae; empa ya pelo e kgopo yena o tla nyediswa.

⁹ Ya nyediswang, a mpang a itshebeletsa, o fetisa ya ikakasang a se na bohobe.

¹⁰ Motho ya lokileng o baballa ho phela ha kgomo ya hae, empa mehauhelo ya e mobe e bohloko.

¹¹ Ya itemelang tshimo o tla kgora bohobe; haele ya ineelang tsa bosawana, ha a na kelello.

¹² Takatso ya e mobe e tla mo isa sefing sa ba bolotsana; empa motso wa ya lokileng o bea ditholwana.

¹³ E mobe o tshwaswa ke molato wa melomo ya hae, empa ya lokileng o tla tswa tsietsing.

¹⁴ Ka tsa molomo wa hae motho o tla kgora molemo; mme motho o tla putswa ka seo matsoho a hae a se sebetsang.

¹⁵ Tsela ya lewatla e lokile mahlong a lona; empa ya amohelang keletso o bohlale.

¹⁶ Ya lewatla o hlahisa bohale ba hae feela; empa ya masene o pata tshito ya ya mo sitetsweng.

¹⁷ Motho ya lokileng o bolela nnete, o hlahisa yona; empa paki e leshano e bolela bohata.

¹⁸ E mong ha a bebera, puo tsa hae di hlaba jwaloka tsenene, empa molomo wa ya bohlale o a thoba.

¹⁹ Molomo wa nnete o tla tiya ka ho sa feleng; empa leleme le bohata ke la motsotso o kang ha ke panya.

²⁰ Ba rerang bobe, lonya le ka pelong tsa bona; empa ba rerang kgotso ke bona ba thabelang batho.

²¹ Ya lokileng a ke ke a tlelwa ke tsietsi; empa ba babe ba tla atelwa ke mahlomola.

²² Melomo e mano ke manyala ho Jehova; empa ba bolelang nnete ba mo kgahlisa.

²³ Ya masene o ipolokela tsebo; empa pelo tsa mawatla di tumisa bohlanya ba wona.

²⁴ Letsoho la motho ya mahlahahlaha le tla busa; empa ya botswa e tla ba mohlanka wa ba bang.

²⁵ Maswabi a fifatsa pelo ya motho; empa puo e molemo e a e thabisa.

²⁶ Ya lokileng ke motsamaisi wa bahabo; empa tsela ya ba babe e a ba lahla.

²⁷ Sekgoba se tswafa le ho phallela phoofolo ya sona; empa ntho tse molemo di ruwa ke batho ba kgothetseng.

²⁸ Tseleng ya ho loka bophelo bo teng, mme mmileng wa hona ho na le ho se shwe.