Diproverbia 11 - Sesotho 1909/1961 (SO)

¹ Sekala sa bohata se hloilwe ke Jehova, empa tekanyo ya nnete e a mo kgahlisa.

² Ha ho hlaha boikgohomoso, eba dihlong di a hlaha le tsona; empa bohlale bo ho ba ikokobetsang.

³ Bokgabane ba ba lokileng bo tla ba tsamaisa; empa bokgopo ba ba babe bo tla ba timetsa.

⁴ Maruo ha a thuse letho mohla letsatsi la bohale, empa ho loka ho lwela lefung.

⁵ Ho loka ha motho ya lokileng ho tla mo hlekela tsela, empa e mobe o tla dihelwa ke bobe ba hae.

⁶ Ho loka ha batho ba kgabane ho tla ba pholosa, empa e mobe bokgopo ba hae bo tla mo tshwasa.

⁷ Mohla ho shwang e mobe, tshepo ya hae e a timela, le yona tebello ya ya sa lokang e a fela.

⁸ Ya lokileng o lwelwa tsietsing, empa bakeng sa hae ho wela ya sa lokang.

⁹ Ka molomo wa hae monyefodi o bolaya ba habo, empa ba lokileng ba bolokwa ke tsebo.

¹⁰ Ha ba lokileng ba atleha, motse o a thaba; empa mohla ho timelang ba babe, ke ditlatse feela.

¹¹ Hlohonolofatso ya ba lokileng e haha motse; empa o qhalwa ke melomo ya ba babe.

¹² Ya nyedisang wa habo ha a na kelello; empa ya nang le kutlwisiso o a kgutsa.

¹³ Ya tjhakelang ho qoqa o phunya makunutu; empa ya pelo e tshepehang o boloka taba.

¹⁴ Setjhaba se dihuwa ke ho hloka dikeletso; poloko e teng ha baeletsi ba le bangata.

¹⁵ Ya itlamellang ka molato wa e mong o tla tsieleha; empa ya hloileng ba phathatsanang letsoho, yena o iketlile.

¹⁶ Mosadi ya molemo o ithuela hlompho; batho ba matla ba ipatlela menono.

¹⁷ Motho ya molemo o etsetsa moya wa hae molemo; empa ya lonya o itshenya mmele.

¹⁸ E mobe o sebetsa mosebetsi o tla mo thetsa; empa ya jalang ho loka o na le moputso o tiileng.

¹⁹ Ho loka ha sebele ho isa bophelong; haele ya latelang bobe, yena o mathela lefung.

²⁰ Ba pelo di kgopo ke manyala ho Jehova; empa ba metsamao e bokgabane, o kgahlwa ke bona.

²¹ Ruri e mobe a ke ke a lesa ho otlwa; empa leloko la motho ya lokileng le tla namolelwa.

²² Mosadi ya sefahleho se setle, empa a hloka kelello, ke lesale la kgauta nkong tsa kolobe.

²³ Seo motho ya lokileng a se dumang ke botle ruri; empa seo ba babe ba ka se tshepang ke kgalefo feela.

²⁴ E mong o a fana athe o ntse a atelwa ke dintho; e mong o a konana, mme o fetoha mofumanehi.

²⁵ Ya tsebang ho fana o tla nona; ya nosetsang o tla nosetswa le yena.

²⁶ Ya hanang le mabele a hae, o tla rohakwa ke batho; empa ya dumelang ho rekisa ka wona, o na le hlohonolofatso hloohong ya hae.

²⁷ Ya qophellang botle o tla fumana mohau, empa ya batlang bobe, bobe bo tla mo tshwara.

²⁸ Ya itshepisang maruo a hae o tla wa, empa ya lokileng o tla hola jwaloka lekala le mahlaku.

²⁹ Ya ferekanyang ntlo ya hae, lefa la hae e tla ba moya feela; lewatla e tla ba mofo wa motho ya pelo e hlalefileng.

³⁰ Tholwana tsa motho ya lokileng ke sefate sa bophelo; ya bohlale o hapa meya ya batho.

³¹ Bonang! ha esita motho ya lokileng a fuwa moputso wa hae lefatsheng lena, ho tla ba jwang ho e mobe le ho moetsadibe!