Dipesaleme 96 - Sesotho 1909/1961 (SO)

Ho atametse mmuso wa Modimo.

¹ Binelang Jehova sefela se setjha; binelang Jehova, lona, baahi bohle ba lefatshe!

² Binelang Jehova, le rorise lebitso la hae, le bolele poloko ya hae ka matsatsitsatsi.

³ Le bolele kganya ya hae hara ditjhaba, le mehlolo ya hae hara mefuta yohle!

⁴ Hobane Jehova o moholo, o lokelwa ke ho roriswa ka ho fetisisa; o tshabeha ho fetisa medimo kaofela;

⁵ hobane medimo yohle ya ditjhaba ke ditshwantsho feela, empa Jehova o entse mahodimo.

⁶ Kganya le letlotlo di pela hae, matla le botle di sehalalelong sa hae.

⁷ Lona, mefuta ya ditjhaba, busetsang ho Jehova, busetsang ho Jehova kganya le matla.

⁸ Busetsang ho Jehova kganya e tshwanelang lebitso la hae; tlisang dinyehelo, le kene mabaleng a hae!

⁹ Kgumamang pela Jehova ka bokgabane bo halalelang. Le thothomele pela hae, lona baahi bohle ba lefatshe!

¹⁰ Ereng hara ditjhaba: Jehova o a busa! lefatshe le tiya ke hona, ha le sisinyehe; o ahlola ditjhaba ka ho loka.

¹¹ Mahodimo a ke a thabe, mme lefatshe le hlasimolohe; lewatle a le ke le dume le tsohle tse ho lona;

¹² dithota di ke di nyakalle le tse ho tsona kaofela; difate tsohle tsa meru di etse ditlatse tsa thabo pela Jehova!

¹³ Hobane o ya tla ho ahlola lefatshe. O tla ahlola lefatshe ka ho loka, le ditjhaba ka nnete ya hae.