Dipesaleme 95 - Sesotho 1909/1961 (SO)

Motho o ipolela hore o tla ya ka lentswe ya Modimo.

¹ Tloong, re phahamisetseng dipina tsa rona ho Jehova, le mehoo ya rona ya nyakallo ho lefika la poloko ya rona!

² Re itlhahiseng ho yena ka dithoko, re utlwahatse ditlatse tsa rona ka difela pela hae.

³ Hobane Jehova ke Modimo o moholo, ke Morena e moholo ya fetang medimo yohle;

⁴ matebo a lefatshe a diatleng tsa hae, le wona maphahamo a dithaba.

⁵ Lewatle ke la hae, ke mosebetsi wa hae, le lona lefatshe le tiileng le bopilwe ke diatla tsa hae.

⁶ Tloong, re kgumameng, re inameng, re we ka mangole pela Jehova, Mmopi wa rona!

⁷ Hobane ke Modimo wa rona, re setjhaba seo e leng modisa wa sona, mohlape o tsamaiswang ke letsoho la hae.

⁸ Kajeno, ha le utlwa lentswe la hae, le se ke la thatafatsa dipelo tsa lona, jwaloka mohla Meriba, le mehleng ya Massa, feelleng,

⁹ moo bontata lona ba ntekileng teng, ba nteka leha ba bone diketso tsa ka.

¹⁰ Ka tenwa ke moloko oo ka dilemo tse mashome a mane, ka re: Ke setjhaba seo pelo ya sona e kgelohileng; ha ba tsebe ditsela tsa ka.

¹¹ Ke moo ke hlapantseng bohaleng ba ka, ka re: Ba ke ke ba ba ba kena phomolong ya ka!