Dipesaleme 86 - Sesotho 1909/1961 (SO)

Thapelo ya morapedi ya hloriswang.

Thapelo ya Davida.

¹ Jehova, sekeha tsebe ya hao, o nkarabele, hobane ke ya madimabe, ke ya lesitsi.

² Boloka moya wa ka, hobane ke e mong wa batshepehi ba hao! Thusa mohlanka wa hao ya o tshepang, wena, Modimo wa ka!

³ O nkgauhele, Morena, hobane ke bitsa ho wena tsatsi lohle!

⁴ O thabise moya wa mohlanka wa hao, hobane ke phahamisetsa moya wa ka ho wena, Morena.

⁵ Hobane wena, Morena, o molemo, o mosa, o tletse lereko hobohle ba o rapelang.

⁶ Jehova, sekehela thapelo ya ka tsebe, o ele thapediso tsa ka hloko.

⁷ Ke o rapela ka letsatsi la ka la matswalo, ka hobane o a nkutlwa.

⁸ Hara medimo ha ho o tshwanang le wena, Morena; ha ho letho le ka lekanang le mesebetsi ya hao!

⁹ Ditjhaba tsohle tseo o di entseng di tla tla kgumama pela hao, Morena, di tlotlise lebitso la hao!

¹⁰ Hobane o moholo, o etsa meeka, o Modimo o nnotshi.

¹¹ Jehova, mpontshe tsela ya hao, ke tle ke tsamaye nneteng ya hao! o tlamelle pelo ya ka yohle le tshabo ya lebitso la hao!

¹² Ke tla o rorisa, Morena, Modimo wa ka, ka pelo ya ka yohle, ke tlotlise lebitso la hao ka ho sa yeng kae!

¹³ Hobane mohau wa hao o moholo ka nqa ho nna, mme o nyolotse moya wa ka tlasetlase nqalong ya bafu.

¹⁴ Oho Modimo, baikakasi ba mpokanetse, letshwele la batho ba tshabehang le batla bophelo ba ka; ha ba ka ba o bea pela mahlo a bona.

¹⁵ Empa wena, Morena, o Modimo o lereko, o molemo, o diehang ho halefa, o tletseng mohau le nnete.

¹⁶ O retelehele ho nna, o nkgauhele, o nee mohlanka wa hao matla a hao, o pholose mora wa lekgabunyane la hao.

¹⁷ O etse pontsho bakeng sa ka ya hoba o molemo ho nna, e tle e bonwe ke dira tsa ka, di ke di swabe! hobane, Jehova, o a nthusa, o a ntshedisa.