Dipesaleme 83 - Sesotho 1909/1961 (SO)

Thapelo ya ho ipea ho Modimo, ha ditjhaba di kopanetse ya o tshepileng.

Sefela. Pesaleme ya Asafe.

¹ Oho Modimo, o se ke wa thola, o se ke wa thibana ditsebe, o se ke wa dula o ikgutseditse, Modimo.

² Hobane dira tsa hao di a dumaduma, ba o hloyang ba emisa dihlooho;

³ ba rera setjhaba sa hao ka ho se lohela mano, ba botsana hodima ba sirelwang ke wena.

⁴ Ba re: Tloong, re ba fedise hara ditjhaba, lebitso la Iseraele le se ke la hlola le bolelwa!

⁵ Ba botsana ba le pelo e le nngwe, ba etsa selekane ho o lwantsha:

⁶ e leng ba ditenteng tsa Edomo, le Baishmaele, Bamoabe, le Bahagarene,

⁷ Gebale, le Ammone, le Amaleke, le Bafilesta hammoho le baahi ba Tire;

⁸ Baassiria le bona ba ikopantse le bona, ba adimile bana ba Lota matsoho a bona. (Sela.)

⁹ O ba etse jwalokaha o entse Midiane, le Sisera, le Jabine, nokaneng ya Kishone,

¹⁰ ba feletseng Ene-Dore, mme ditopo tsa bona tsa nontsha mobu!

¹¹ O etse mahosana a bona a be jwaloka Orebe le Seebe, le marena a bona kaofela a be jwaloka Seba le Tsalmunna;

¹² hobane ba re: A re inkeleng, re rue meaho ya Modimo!

¹³ Modimo wa ka, ba be pela hao jwaloka setsokotsane, jwaloka mooko o fefolwang ke moya,

¹⁴ jwaloka mollo ha o qeta moru, le jwaloka lelakabe ha le tjhesa dithaba.

¹⁵ O ba lelekise jwalo ka sefefo sa hao, o ba tshose ka moya wa hao wa letsukutsuku!

¹⁶ Apesa difahleho tsa bona ka dihlong, ba tle ba batle lebitso la hao, Jehova.

¹⁷ A ba ke ba tsielehe, ba shwe motlopo kamehla, ba fele ba hlabilwe ke dihlong!

¹⁸ Ba tle ba tsebe hore wena, eo lebitso la hao e leng Jehova, o rena o nnotshi lefatsheng lohle.