Dipesaleme 80 - Sesotho 1909/1961 (SO)

Thapelo e rapellang setjhaba sa Jehova.

Ho monga baphokodi. Ka pina ya Shoshanime (mehaladitwe). Bopaki ba Asafe. Pesaleme.

¹ Sekeha tsebe, modisa wa Iseraele; wena ya tsamaisang Josefa jwalokaha ho tsamaiswa mohlape, wena ya dutseng hodima dikerubime, hlaha kganyeng ya hao!

² Tsosa bonatla ba hao pontsheng ya Efraime, le Benjamine, le Manasse, o tle ho re thusa.

³ Oho Modimo, o boele o re ahise, o kgantshe sefahleho sa hao, mme re tla bolokeha!

⁴ Jehova, Modimo wa makgotla, o tla nne o halefe ho isa kae, leha setjhaba sa hao se ntse se o rapela?

⁵ O se jesa bohobe ba meokgo, o ba nosa meokgo ka tekanyo e kgolo.

⁶ O re entse ba tsekwang ke ba bapileng le rona, dira tsa rona di re entse sesomo.

⁷ Oho Modimo wa makgotla, o boele o re ahise, o kgantshe sefahleho sa hao, mme re tla bolokeha!

⁸ O ne o fothole morara Egepeta, wa lelekisa ditjhaba, mme wa o hloma;

⁹ wa o lokisetsa sebaka, mme wa nama metso, wa tlala naha,

¹⁰ dithaba tsa kgurumetswa ke moriti wa wona, makala a wona a eba jwaloka dikedare tsa Modimo,

¹¹ wa namisa makalana a wona ho isa lewatleng, le mahlomela a wona ho isa nokeng.

¹² Na o rapalaleditseng metero ya wona, o tle o kotulwe ke bafeti kaofela?

¹³ O sohlokanngwa ke dikolobe tsa meru, diphoofolo tsa naha di tlile ho hakolela teng!

¹⁴ Oho boya, Modimo wa makgotla! tadima o le lehodimong, mme o bone, o ele morara ona hloko!

¹⁵ O sireletse seo letsoho le letona la hao le se hlomileng, le lehlomela leo o ikgethetseng lona.

¹⁶ Morara o tjhele ke mollo, o remilwe; ba fela ke tshokelo ya sefahleho sa hao.

¹⁷ Sireletsa motho, mosebetsi wa letsoho la hao le letona, le mora wa motho eo o ikgethetseng yena.

¹⁸ Mme ha re sa tla hlola re o tlohela; o boele o re phedise, mme re tla rapela lebitso la hao.

¹⁹ Jehova, Modimo wa makgotla, o boele o re ahise, o kgantshe sefahleho sa hao, mme re tla bolokeha!