Dipesaleme 8 - Sesotho 1909/1961 (SO)

Pina ya ho tlotlisa Mmopi wa dinaledi, le ho mmapisa le bonyenyane ba motho.

Ho monga baphokodi. Ka Gitthithe. Pesaleme ya Davida.

¹ Jehova, Morena wa rona, lebitso la hao le bokgabane hakakang lefatsheng lohle, wena ya beileng kganya ya hao mahodimong!

² O theile kganya ya hao ka molomo wa bana le wa ba anyeswang ka baka la ba o lwantshang, ho kgutsisa sera sa hao le moiphetetsi.

³ Ha ke boha lehodimo la hao, mosebetsi wa menwana ya hao, kgwedi le dinaledi tseo o di bopileng, ke re:

⁴ Na motho keng, ha o tla mo hopola? le mora motho keng, ha o tla mo hlokomela?

⁵ O mo entse ya tlasana ho Modimo, o mo rwesitse kganya le boholo;

⁶ o mo laodisitse mesebetsi ya matsoho a hao; o beile tsohle katlasa maoto a hae;

⁷ dinku hammoho le dikgomo, le dibatana tsa naha,

⁸ le dinonyana tsa lehodimo, le dihlapi tsa lewatle, tsohle tse itsamaelang ditseleng tsa lewatle.

⁹ Jehova, Morena wa rona, lebitso la hao le bokgabane hakakang lefatsheng lohle!