Dipesaleme 77 - Sesotho 1909/1961 (SO)

Motho ya leng mahlomoleng o ikgothatsa ka tse seng di fetile.

Ho monga baphokodi. Ka pina ya Jeduthune. Pesaleme ya Asafe.

¹ Lentswe la ka le nyolohela ho Modimo, ke ntse ke howa; lentswe la ka le nyolohela ho Modimo; hola o ka nkutlwa!

² Ka letsatsi la ka la matswalo ke batla Morena, ka bosiu matsoho a ka a otlolohile, a sa kgathale; moya wa ka o hana tshediso.

³ Ke hopola Modimo, ke sisa pelo; ke a nahana, mme moya wa ka o a tsieleha. (Sela.)

⁴ O fadimehisa dintshi tsa ka; ke sa ferekane, ke sitwa ke puo.

⁵ Ke hopola matsatsi a kgale le dilemo tsa boholoholo.

⁶ Bosiu ke elellwa dipina tsa ka, ke losa pelong ya ka, mme moya wa ka o a nahana.

⁷ Na Morena a ka lahla motho ka ho sa feleng? A ke ke a boela a hauhela na?

⁸ A mohau wa hae o se o feletse ruri? Lentswe la hae le se le kgutsitse kamehla le mehla na?

⁹ Na Modimo o lebetse ho utlwela batho bohloko? Bohaleng ba wona na o thibetse mehauhelo ya wona na? (Sela.)

¹⁰ Ka re: Se nkutlwisang bohloko, ke hoba letsoho la Mookamedi ya phahameng haesale lona ...

¹¹ Empa ke tla hopola diketso tsa Jehova, ke elellwe meeka ya hao ya boholoholo;

¹² ke tla bolela mesebetsi ya hao kaofela, ke qaqisetse diketso tsa hao.

¹³ Oho Modimo, tsela ya hao e a halalela. Modimo ke ofe o moholo, o jwaloka Modimo wa rona?

¹⁴ Ke wena Modimo o etsang meeka; o bonahaditse matla a hao hara ditjhaba.

¹⁵ Ka letsoho la hao o lopolotse setjhaba sa hao, bana ba Jakobo le ba Josefa. (Sela.)

¹⁶ Metsi a o bone, Modimo, metsi a o bone, mme a reketla; madiba le wona a tsukutleha.

¹⁷ Maru a tsurutla metsi, maru a thetheretsa; metsu ya hao ya phosetswa mane le mane,

¹⁸ diaduma tsa hao tsa duma hara setsokotsane, mahadima a hao a bonesa lefatshe; lefatshe la tshoha, la reketla.

¹⁹ Wa iketsetsa tsela lewatleng, mmila metsing a maholo, mehlala ya hao ha e a ka ya tsejwa.

²⁰ Wa tsamaisa setjhaba sa hao jwalokaha ho tsamaiswa dinku, ka letsoho la Moshe le la Aarone.