Dipesaleme 58 - Sesotho 1909/1961 (SO)

Thapelo ya hore Modimo o otle bakgopo.

Ho monga baphokodi. Ka pina ya Aletashethe. Sefela sa Davida.

¹ Fale le tla nne le ikgutsetse na? Na ha le tumise ho loka keng na? A le tla ahlola ka tokelo, lona bana ba batho?

² Tjhe, le etsa ho sa lokang dipelong tsa lona, mme tokiso ya lona lefatsheng ke ho tsohela batho matla feela.

³ Ba bolotsana ba kgelohile esale ba etswa popelong, mahata a lahlehile esale a hlaha;

⁴ ba na le mahloko a kang a dinoha, ba tshwana le marabe a ithibanyang ditsebe,

⁵ a tle a se ke a mamela lentswe la moupelli le la ngaka e tsebang ho upa.

⁶ Modimo, o ba robe meno melomong ya bona! Jehova, pshatla mehlahare ya ditau!

⁷ Ba fele jwaloka metsi a phallang, metsu eo ba e fulang e thithibane.

⁸ Ba be jwaloka kgofu e menyelang e ntseng e eya, ba be jwaloka sefolotsana sa mosadi se sa kang sa bona letsatsi.

⁹ Dipitsa tsa lona di eso ho utlwe mollo wa meutlwa, e metala le e tukileng e tla phamolwa hammoho ke setsokotsane.

¹⁰ Ke moo ya lokileng a tlang ho thaba, ha a bona phetetso; o tla hlatswa maoto a hae mading a molotsana;

¹¹ mme ho tla thwe: Moputso o teng ruri wa ya lokileng; ruri, Modimo o teng o ahlolang lefatshe.