Dipesaleme 57 - Sesotho 1909/1961 (SO)

Thapelo ya motho ha a tla ya robala a le nahathothe.

Ho monga baphokodi. Ka pina ya Aletashethe. Sefela sa Davida, sa mohla a ipatileng lehaheng, ha a baleha pela Saule.

¹ Nkgauhele, Modimo, o nkgauhele! Hobane moya wa ka o ipatlela setshabelo sa wona ho wena, ke balehela moriting wa mapheo a hao, ditshenyo tsena di be di fete.

² Ke howeletsa ho Modimo, Mookamedi ya phahameng, Modimo o sebetsang bakeng sa ka!

³ O ya romela, o le mahodimong, ho tla mpoloka, ha ba mpefeletsweng ba nnyedisa. (Sela.) Modimo o tla romela mohau wa wona le nnete ya wona.

⁴ Moya wa ka o hara ditau, ke robala hara batho ba phutsalatsang malakabe a mollo, hara batho bao meno a bona e leng marumo le metsu; le maleme a bona ke matlele a bohale.

⁵ Modimo, o iphahamise, o be o okamele mahodimo; kganya ya hao e bonahale lefatsheng lohle!

⁶ Ba ne ba tjhehile leraba tlasa maoto a ka; moya wa ka o ne o kobehile. Ba ne ba tjhekile lemena pela ka, ho wetse bona ho lona. (Sela.)

⁷ Modimo, pelo ya ka e tiile, pelo ya ka e tiile. Ke rata ho o roka ka dipina le ka difela.

⁸ Kubuloha moya wa ka; kubulohang, lona thomo le harepa ya ka! Ke tla tsoha le mafube a meso!

⁹ Morena, ke tla o rorisa hara batho, ke o roke hara ditjhaba;

¹⁰ hobane mohau wa hao o moholo ho ya fihla mahodimong, le nnete ya hao ho isa marung.

¹¹ Modimo, o iphahamise, o be o okamele mahodimo; kganya ya hao e bonahale lefatsheng lohle!