Dipesaleme 54 - Sesotho 1909/1961 (SO)

Motho o a ikgothatsa, leha a teetswe hare ke ba ratang ho mmolaya.

Ho monga baphokodi. Sefela sa Davida, se tle se binwe ka tse tidinngwang, sa mohla Basife ba tlileng ho Saule, ba re: Na Davida ha a ipate hara rona na?

¹ Oho Modimo, o mpoloke ka lebitso la hao, o nkemele ka matla a hao!

² Modimo, o mamele thapelo ya ka, o sekehele ditaba tsa molomo wa ka tsebe!

³ Hobane basele ba ntsohela matla, batho ba sehloho ba batla bophelo ba ka; ha ba ka ba bea Modimo pela mahlo a bona. (Sela.)

⁴ Bonang, Modimo ke mothusi wa ka, Morena ke e mong wa ba emelang bophelo ba ka.

⁵ O tla dihela hodima bao e leng dira ho nna bolotsana ba bona. O ke o ba qete, botshepehing ba hao!

⁶ Ka pelo e mafolofolo ke tla o etsetsa mahlabelo, ke rorise lebitso la hao, Jehova, hobane le molemo;

⁷ hobane o ntopolotse ditsietsing tsa ka kaofela, mme mahlo a ka a bone tshenyeho ya bao e leng dira ho nna.