Dipesaleme 47 - Sesotho 1909/1961 (SO)

Ditjhaba di rorise Morena.

Ho monga baphokodi. Pesaleme ya bara ba Kore.

¹ Lona ditjhaba kaofela, opang ka diatla! Hlasimolohelang Modimo ka dipina tsa nyakallo!

² Hobane Jehova, Mookamedi ya phahameng, o tshwanelwa ke ho tshajwa; ke yena Morena e moholo wa lefatshe lohle.

³ O beile ditjhaba katlasa rona, le merabe katlasa maoto a rona;

⁴ O re kgethetse lefa la rona, mokgabo wa Jakobo eo a mo ratang. (Sela.)

⁵ Modimo o nyoloha ka mehoo ya thabo, Jehova o phahama ka modumo wa terompeta.

⁶ Binelang Modimo; binang, le binele Morena wa rona; binang!

⁷ Hobane Modimo ke Morena wa lefatshe lohle: o roriseng ka sefela se seholo!

⁸ Modimo o rena hodima ditjhaba; Modimo o dutse teroneng e halalelang ya wona.

⁹ Mahosana a ditjhaba a phuthehile hammoho ho ba setjhaba sa Modimo wa Abrahama; hobane dithebe tsa lefatshe ke tsa Modimo; o phahamile haholo ka ho fetisisa.