Dipesaleme 46 - Sesotho 1909/1961 (SO)

Modimo ke setshabelo sa rona.

Ho monga baphokodi. Pesaleme ya bara ba Kore. Pina e binwang ka Alamothe.

¹ Modimo ke setshabelo sa rona le matla a rona, ke thuso e fetisisang ditsietsing.

² Ka baka leo, re ke ke ra tshoha, leha lefatshe le ka sisinyeha, mme dithaba tsa tsokotseha mahareng a mawatle;

³ leha maqhubu a wona a ka duma, a ntsha mafilo, mme bohale ba wona ba sisinya dithaba! (Sela.)

⁴ Noka e teng eo melatswana ya yona e nyakallisang motse wa Modimo, sehalalelo sa meaho ya Mookamedi ya phahameng.

⁵ Modimo o mahareng a wona; o ke ke wa sisinyeha; o fuwa thuso ke Modimo e sa le mafube a meso.

⁶ Ditjhaba di mohorohoro, mebuso e a sisinyeha. Modimo o utlwahatsa lentswe la wona, lefatshe le a qhibiliha.

⁷ Jehova wa makgotla o na le rona, Modimo wa Jakobo ke qhobosheane ya rona! (Sela.)

⁸ Tloong, le bohe diketso tsa Jehova, kamoo a sentseng lefatshe kateng.

⁹ O fedisitse dintwa le ho isa pheletsong ya lefatshe, o robile diqha, a robakanya marumo, a tjhesa makoloi a ntwa mollong.

¹⁰ Tlohelang, mme le tsebe hoba ke nna Modimo o busang ditjhaba, o busang lefatshe!

¹¹ Jehova wa makgotla o na le rona, Modimo wa Jakobo ke qhobosheane ya rona! (Sela.)