Dipesaleme 36 - Sesotho 1909/1961 (SO)

Bomadimabe ba ya lahlileng. Modimo le bomadimatle ba ya nang le kopano le wona.

Ho monga baphokodi. Pesaleme ya Davida, mohlanka wa Jehova.

¹ E mobe o mamela bolotsana pelong ya hae, ho tshaba Jehova ha ho yo pela mahlo a hae;

² hobane ka mokgwa wa ho bona ha hae, o iqeka e le yena hore ho ke ke ha fihlelwa bokgopo ba hae e leng ho hloya.

³ Ditaba tsa molomo wa hae ke bokgopo le thetso, o lesitse ho hlalefa le ho etsa botle.

⁴ O rera bokgopo diphateng tsa hae; o ya ka tsela e seng molemo; ha a na ho hloya bobe.

⁵ Jehova, mohau wa hao o phahame ho isa mahodimong le botshepehi ba hao ho isa marung.

⁶ Ho loka ha hao ho ka ka dithaba tsa Modimo, dikahlolo tsa hao di tebile jwaloka lewatle. Jehova o baballa batho le diphoofolo.

⁷ Modimo, mohau wa hao o rateha hakakang! Bana ba batho ba balehela moriting wa dipheo tsa hao;

⁸ ba kgora ke nala ya ntlo ya hao, o ba nosa dinokeng tsa menate ya hao.

⁹ Hobane sediba sa bophelo se ho wena; re bona lesedi leseding la hao.

¹⁰ O bolokele ba o tsebang mohau wa hao, o nne o fe ba pelo di lokileng ho loka ha hao;

¹¹ Leoto la boikgohomoso le se ke la nkgatakela, letsoho la ba babe le se ke la mpalehisa!

¹² Ba bolotsana ba se ba ya wa, ba dihilwe; ha ba sa tla hlola ba tsoha.