Dipesaleme 30 - Sesotho 1909/1961 (SO)

Thapelo ya teboho ya motho ya thusehileng bolwetseng bo tshabehang.

Pesaleme; sefela sa Davida bakeng sa kgakolo ya ntlo.

¹ Jehova, ke a o hodisa, hobane o mpholositse, mme ha o a ka wa lesa hore bao e leng dira ho nna ba thabe ka nna.

² Jehova, Modimo wa ka, ka na ka howa ho wena, mme o mphodisitse.

³ Jehova, o nyolotse moya wa ka nqalong ya bafu, o ntsositse, hore ke se theohele lebitleng.

⁴ Binelang Jehova, lona bakgethwa ba hae, le rorise lebitso la hae le halalelang.

⁵ Hobane kgalefo ya hae ke ya motsotso feela, empa mohau wa hae o tshwere bophelo bohle ba motho; leha dillo di ka fapohela ho rona bosiu, hosasa e se e le nyakallo.

⁶ Ho iketleng ha ka, ke fela ke ne ke itse: Nke ke ka sisinyeha le ka mohla o le mong!

⁷ Jehova, o ne o tiisitse thaba ya ka ka mohau wa hao; empa o kile wa pata sefahleho sa hao, mme ka tsieleha.

⁸ Jehova, ka ba ka howa ho wena, ka beela Jehova thapedisiso ya ka, ka re:

⁹ Na o ka ruang ka madi a ka le ka ho theohela ha ka lebitleng?

¹⁰ Na lerole le ka o rorisa, kapa le ka bolela botshepehi ba hao na?

¹¹ Jehova, mamela, o nkutlwele bohloko! Jehova, o be o nthuse!

¹² Wa ba wa fetola dikgapa tsa ka nyakallo, wa lokolla lesela la ka le mahwashe, wa ntlama ka senyepa sa thabo, pelo ya ka e tle e o binele, e se ke ya kgutsa. Jehova, Modimo wa ka, ke rata ho o rorisa ka ho sa feleng.