Dipesaleme 3 - Sesotho 1909/1961 (SO)

Sefela sa hosasa sa mohlomohi.

Pesaleme ya Davida ya mohla a balehang pela Absalome, mora hae.

¹ Jehova, bao e leng dira ho nna ba bangata hakakang! Ba bangata hakakang ba ntsohelang matla!

² Ba bangata hakakang ba reng bakeng sa moya wa ka: Ha a sa na polokeho ho Modimo. (Sela.)

³ Empa wena, Jehova, o thebe e ntshireletsang, o kganya ya ka, hlooho ya ka e eme ka wena.

⁴ Ke bitsa ho Jehova ka lentswe la ka, mme o nkaraba a le thabeng ya hae e kgethehileng. (Sela.)

⁵ Ke a sekama, ke robale boroko, mme ke boele ke phaphame, hobane Jehova o a ntiisa.

⁶ Ha ke tshohe dikete tsa batho ba ntikileng ho ntwantsha.

⁷ Tsoha, Jehova; o mpoloke, Modimo wa ka; etswe e le wena ya robang mohlahare wa dira tsa ka kaofela, o thuhang meno a bakgopo.

⁸ Poloko e tswa ho Jehova! Lehlohonolo la hao ha le ke le be hodima setjhaba sa hao. (Sela.)