Dipesaleme 29 - Sesotho 1909/1961 (SO)

Pesaleme ya diaduma tsa Modimo.

Pesaleme ya Davida.

¹ Bara ba Modimo, busetsang ho Jehova, busetsang ho Jehova kganya le hlompho;

² busetsang ho Jehova kganya ya lebitso la hae! Kgumamelang Jehova ka mekgabo e kgethehileng.

³ Lentswe la Jehova le duma hodima metsi; Modimo wa kganya o dumisa seaduma sa wona; Jehova o utlwahala hodima metsi a maholo.

⁴ Lentswe la Jehova le matla, lentswe la Jehova le kganya ka boholo!

⁵ Lentswe la Jehova le robakanya dikedare; Jehova o robakanya dikedare tsa Lebanone,

⁶ o di thadisa jwaloka manamane; le Lebanone, le Sirione, jwaloka dinare tse ntjha.

⁷ Lentswe la Jehova le phosa malakabe a mollo;

⁸ lentswe la Jehova le sisinya lefeella, le thothometsa nahathothe ya Kadeshe.

⁹ Lentswe la Jehova le tswadisa dikgama, le hlobodisa meru; ka tempeleng ya hae tsohle di re: Kganya!

¹⁰ A le teroneng ya hae, Jehova e ne e se e le morena mohla morwallo; teroneng ya hae o busa ka ho sa yeng kae.

¹¹ Jehova o tla nea setjhaba sa hae matla; Jehova o tla hlohonolofatsa setjhaba sa hae ka kgotso.