Dipesaleme 26 - Sesotho 1909/1961 (SO)

Thapelo ya mohloriswa ya se nang molato ha a hlolohetswe ntlo ya Modimo.

Pesaleme ya Davida.

¹ Nkahlolele, Jehova! hobane ke phela ka toka ya ka; ke itshepetse Jehova, ha ke sisinyehe.

² O ntekole, Jehova, o batlisise ho nna! O leke letheka la ka le pelo ya ka!

³ Hobane mohau wa hao o pela mahlo a ka, mme ke latela nnete ya hao.

⁴ Ha ke dule le batho ba ratang leshano, ha ke etelane le baikaketsi.

⁵ Ke hloile mokgatlo wa ba bolotsana, ha ke dudisane le batho ba babe.

⁶ Ke hatlela matsoho a ka ho lokeng, ke pota aletare ya hao, Jehova,

⁷ ke ntse ke kgeleketsa lentswe la diteboho le ho bolela mehlolo ya hao kaofela.

⁸ Jehova, ke rata leaho la ntlo ya hao, le nqalo moo kganya ya hao e leng teng.

⁹ O se ke wa tlosa moya wa ka le baetsadibe, leha e le bophelo ba ka le ba batho ba madi,

¹⁰ ba tshwereng polao matsohong a bona, mme seatla sa bona se setona se tletse dineo tsa qeko!

¹¹ Haele nna, ke tla nne ke tsamaye ka toka ya ka; o mpoloke, o nketse ka mohau!

¹² Leoto la ka le tiya tseleng e lokileng. Ke tla roka Jehova diphuthehong.