Dipesaleme 24 - Sesotho 1909/1961 (SO)

Tsa areka ha e isitswa Sione, mohla e latwang ha Obed-Edomo.

Pesaleme ya Davida.

¹ Lefatshe ke la Jehova le tsohle tse ho lona, lefatshe le ba ahileng ho lona.

² Hobane o le theile hodima mawatle, o le tiisitse hodima bodiba.

³ Ke mang ya ka nyolohelang thabeng ya Jehova, ya ka dulang sehalalelong sa hae?

⁴ Ke ya matsoho a se nang molato, ya pelo e hlwekileng, ya sa ineeleng leshano, ya sa hlapanyeng ho ya thetsa.

⁵ Motho ya jwalo o tla bona hlohonolofatso ho Jehova, le ho loka ho Modimo, Mmoloki wa hae.

⁶ Ke eo kabelo ya ba itlhahisang ho yena, ba batlang sefahleho sa hao, Modimo wa Jakobo. (Sela.)

⁷ Phahamisang dihlooho tsa lona, menyako; lona menyako ya kamehla, le iphahamise, ho tle ho kene Morena wa kganya!

⁸ Morena wa kganya ke mang? Ke Jehova ya matla, ya sa sitweng ke letho, Jehova ya matla ntweng.

⁹ Phahamisang dihlooho tsa lona, menyako; lona menyako ya kamehla, le iphahamise, ho tle ho kene Morena wa kganya!

¹⁰ Morena wa kganya ke mang? Ke Jehova wa makgotla, ke yena e leng Morena wa kganya. (Sela.)