Dipesaleme 22 - Sesotho 1909/1961 (SO)

Eli, Eli, lamma sabakthani.

Ho monga baphokodi. Ka Ajelethe-Hashakare (tshephe e tshehadi ya meso). Pesaleme ya Davida.

¹ Modimo wa ka, Modimo wa ka, o ntahletseng? O emelang thoko, o tle o se ke wa mpoloka, o se ke wa nkutlwa ha ke howeletsa?

² Modimo wa ka, ke bitsa motshehare, mme ha o arabe; le bosiu, mme ha ke bone phomolo.

³ Leha ho le jwalo, o Mohalaledi; dithoko tsa Iseraele di teela terone ya hao hare.

⁴ Bontata rona ba nna ba bea tshepo ya bona ho wena, ba bea tshepo ya bona, mme wa ba pholosa;

⁵ ba phahamisetsa mehoo ya bona ho wena, mme ba phonyoha; ba itshepela wena, mme ha ba ka ba swaba.

⁶ Empa nna, ke seboko, ha ke motho; ke mojaradihlong ho batho, le molahluwa wa setjhaba.

⁷ Ke sesomo sa bohle ba mponang; ba swenya melomo ya bona, ba oma ka hlooho,

⁸ ba re: O itshepetse Jehova, a ke a mo pholose, a mmoloke, haele moo a kgahliswa ke yena!

⁹ Efela ke wena ya nntshitseng popelong, wa nna wa ntshepisa matsweleng a mme,

¹⁰ ka nna ka o tshepa esale ke tswalwa; esale le mpeng ya mme o le Modimo wa ka.

¹¹ O se ke wa ba hole le nna, hobane matswalo a haufi, mme ha ke na ya nthusang.

¹² Ke dikilwe ke dipoho tse ngata, dipoho tse bohale tsa Bashane di nkopetse.

¹³ Di ahlamisetsa melomo ya tsona ho nna jwaloka tau e harolang, e purumang.

¹⁴ Ke ikela jwaloka metsi, masapo a ka kaofela a nonyetsehile; pelo ya ka, fubeng sa ka, e a qhibiliha jwaloka mafura a dinotshi;

¹⁵ matla a ka a omile jwaloka lengeta, leleme la ka le manne mahalapeng a ka, o nthobaditse leroleng la lefu.

¹⁶ Hobane dintja di nteetse hare, lekgotla la ba bolotsana le ntikile, ba hlabile diatla tsa ka le maoto a ka.

¹⁷ Nka bala masapo a ka kaofela; bona, ba ntadima, ba kgodisa mahlo a bona ka nna.

¹⁸ Ba arolelana diaparo tsa ka, ba laola kobo ya ka.

¹⁹ Empa, wena, Jehova, o se ke wa suthela hole le nna! Wena, o leng matla a ka, o phakise ho nthusa!

²⁰ O lwele bophelo ba ka lerumong, ke bona feela bo setseng ho nna, o bo lwele marong a dintja.

²¹ O nkgule molomong wa tau, o nkarabe ka ho mpholosa dinakeng tsa dinare.

²² Ke tla bolela lebitso la hao ho banabeso, ke o rorise hara phutheho.

²³ Lona ba tshabang Jehova, le mo roke; lona kaofela moloko wa Jakobo, le mo rorise; le thothomele pela hae, lona kaofela moloko wa Iseraele!

²⁴ Hobane ha a ka a nyedisa, ha a ka a kgesa bohlomohi ba ya hlomohileng, ha a ka a mo patela sefahleho sa hae; empa a nna a mamela mehoo eo a neng a e phahamisetsa ho yena.

²⁵ O tla rokwa ke nna phuthehong e kgolo; ke tla o lefela dikano tsa ka pela ba o tshabang.

²⁶ Ba madimabe ba tla nne ba je, ba kgore; ba batlang Jehova ba tla bina dithoko tsa hae; dipelo tsa lona di tla phela ka ho sa feleng.

²⁷ Dipheletso tsohle tsa lefatshe di tla hopola Jehova, di sokolohele ho yena, mefuta yohle ya ditjhaba e tla kgumama pela hao;

²⁸ hobane mmuso ke wa Jehova, ke yena ya renang hodima ditjhaba.

²⁹ Ba jang menono ya lefatshe ba tla tla, ba je, ba rapele; o tla kgumamelwa ke bohle ba theohelang leroleng, le ke ba sitwang ho iphedisa.

³⁰ Ditloholo tse tlang ho hlaha di tla mo sebeletsa, moloko o tlang o tla bolellwa kganya ya Morena.

³¹ Ba tla tla, ba bolele ho loka ha hae, ba bolelle setjhaba se tlang ho tswalwa hoba ke yena ya entseng hoo.