Dipesaleme 21 - Sesotho 1909/1961 (SO)

Teboho ya morena ya mohla a kgutlang ntweng.

Ho monga baphokodi. Pesaleme ya Davida.

¹ Jehova, matla a hao a thabisa morena, poloko ya hao e a mo nyakalatsa!

² O mo file kamoo pelo ya hae e lakaditseng kateng, ha o a ka wa nyatsa thapelo ya molomo wa hae. (Sela.)

³ O mo rakile ka mahlohonolo a molemo, o mo rwesitse moqhaka wa kgauta e tshekehileng hloohong.

⁴ A nna a o kopa bophelo, mme wa mo fa jona, e le bophelo bo bolelele, bo tiileng, bo sa feleng.

⁵ Kganya ya hae e kgolo ka baka la thuso ya hao, o mo file bokgabane le boholo;

⁶ hobane o mo entse ya lehlohonolo ka ho sa feleng, wa mo nyakalatsa ka sefahleho sa hao.

⁷ Hobane morena o itshepetse Jehova; ka kgauhelo ya Mookamedi ya phahameng, a ke ke a sisinyeha.

⁸ Letsoho la hao le tla tshwara dira tsa hao kaofela; letsoho le letona la hao le tla fihlela ba o hloileng.

⁹ O tla ba etsa ba be jwaloka sebopi se tukileng, tsatsing leo o hlahang ka lona; Jehova o tla ba fedisa ka kgalefo ya hae, mme ba tla tjheswa ke mollo;

¹⁰ o tla fedisa moloko wa bona lefatsheng, le ditloholo tsa bona hara bana ba batho;

¹¹ hobane ba o etseditse bolotsana, ba lohile mano, empa ba tla hloka matla;

¹² o tla ba balehisa ka ho lebisa seqha sa hao difahlehong tsa bona.

¹³ Tsoha, Jehova, ka matla a hao! Re rata ho bina le ho rorisa diketso tsa hao tse phahameng.