Dipesaleme 20 - Sesotho 1909/1961 (SO)

Thapelo ya morena mohla ntwa.

Ho monga baphokodi. Pesaleme ya Davida.

¹ Jehova a ke a o utlwe ka tsatsi la matswalo; lebitso la Modimo wa Jakobo le ke le o sireletse.

² A ke a o romele thuso ya hae e tswang sehalalelong, a o fe ho tiya a le Sione!

³ A ke a hopole dinyehelo tsa hao kaofela, a amohele ditjheso tsa hao! (Sela.)

⁴ A ke a o fe se ratwang ke pelo ya hao, a phethise tseo o di rerileng!

⁵ Etlaba moo re thabelang hlolo ya hao; ka lebitso la Modimo wa rona re tla emisa difolaga tsa rona. Jehova a ke a o fe tsohle tseo o di qelang.

⁶ Le jwale ke a tseba hobane Jehova o pholosa motlotsuwa wa hae; o tla mo araba a le lehodimong la hae le halalelang, ka diketso tse matla tsa letsoho la hae le letona.

⁷ Ba bang ba ithorisa ka makoloi a bona, ba bang ka bakalli ba bona; empa rona, re tla ithorisa ka lebitso la Jehova, Modimo wa rona;

⁸ bona, ba kobeha, ba wa; empa rona, re tla tiya, re eme.

⁹ Jehova, boloka morena! o ke o re utlwe, ha re o rapela!