Dipesaleme 19 - Sesotho 1909/1961 (SO)

Modimo o itshenolela batho ka mesebetsi ya wona le ka lentswe la wona.

Ho monga baphokodi. Pesaleme ya Davida.

¹ Mahodimo a bolela kganya ya modimo, mme sebaka sa lehodimo se bonahatsa mosebetsi wa diatla tsa wona.

² Letsatsi le ho pakela letsatsi le leng, bosiu bo ho tsebisa bosiu bo bong.

³ Hase polelo, hase mantswe ao modumo wa wona o sa utlwahaleng.

⁴ Tumo ya tsona e hasane lefatsheng lohle, dipolelo tsa tsona di ile pheletsong ya lefatshe. O hlometse letsatsi ntlo ya lona teng;

⁵ le tloha jwaloka monyadi ha a tloha tlung ya hae, le thaba jwaloka mohale ya mathelang lephallong;

⁶ le tloha pheletsong ya mahodimo, mme phallong ya lona le fella pheletsong e nngwe: ha ho letho le ipatelang lebatama la lona.

⁷ Molao wa Jehova o lokile, o kgatholosa moya; bopaki ba Jehova bo a tshepeha, bo hlalefisa sethoto.

⁸ Ditemoso tsa Jehova di lokile, di thabisa pelo; ditaelo tsa Jehova di hlwekile, di edisa mahlo.

⁹ Tshebeletso ya Jehova e hlwekile, e hloleha kamehla; dikahlolo tsa Jehova ke nnete, di lokile kaofela;

¹⁰ di fetisa kgauta ka theko, le kgauta e ngata e tshekehileng, di fetisa le dinotshi ka monate, le tse rothang kgekgeng ya tsona.

¹¹ Mohlanka wa hao o ediswa ke tsona; ho bolokweng ha tsona ho na le moputso o moholo.

¹² Ke mang ya ka lemohang diphoso tsa hae kaofela? O ntshwarele tse nkgakileng!

¹³ Hape, o boloke mohlanka wa hao ho baikakasi, ba se ke ba rena hodima ka; ke moo ke tla hloka ho nyatseha, mme etlaba ke sesefile ditlolo tse kgolo.

¹⁴ O amohele mantswe a molomo wa ka, o kgahliswe ke ho nahana ha pelo ya ka, wena, Jehova, lefika la ka le monamoledi wa ka!