Dipesaleme 147 - Sesotho 1909/1961 (SO)

Thoko e rokang ya babaletseng, ya tsositseng Jerusalema.

¹ Rorisang Jehova, hobane ho hotle ho roka Modimo wa rona; e, ke ntho e monate; thoko e a mo tshwanela.

² Jehova o tsosa Jerusalema, o bokella balelekwa ba Iseraele.

³ O fodisa ba pelo di hlabehileng, o tlamella maqeba a bona.

⁴ O lekanya palo ya dinaledi, o di rea mabitso kaofela.

⁵ Morena wa rona o moholo, matla a hae a maholo ka ho fetisisa; kutlwisiso ya hae ha e na ho lekanngwa.

⁶ Jehova o tsosa ba ikokobetsang, o kokobetsa ba babe ho isa fatshe.

⁷ Binelang Jehova diteboho, le roke Modimo wa rona ka harepa!

⁸ O thiba lehodimo ka maru, o lokisa pula ho na lefatsheng; o medisa jwang dithabeng;

⁹ o fa diphoofolo dijo tsa tsona, o fepa madinyane a makgwaba a llang.

¹⁰ Ha a re letho ka matla a pere, ha a kgahliswe ke maoto a motho.

¹¹ Jehova o kgahliswa ke ba mo tshabang, ba itshepelang mohau wa hae.

¹² Jerusalema, rorisa Jehova! Sione, o roke Modimo wa hao!

¹³ Hobane o tiisa mekwallo ya menyako ya hao, o hlohonolofatsa bara ba hao kahare ho wena.

¹⁴ O bea kgotso meeding ya hao, o o kgorisa ka moko wa koro.

¹⁵ O romela lefatshe taelo ya hae, lentswe la hae le tjhatjhametsa kapelepele.

¹⁶ O nesa lehlwa, le lesweu jwaloka boya ba nku; o hasa serame fatshe jwaloka molora;

¹⁷ o diha sefako sa hae se thata; ke mang ya ka tsebang ho ema pela dirame tsa hae?

¹⁸ O romela lentswe la hae, a di qhibidihise; o fokisa moya wa hae, metsi a phorosetse.

¹⁹ O senoletse Jakobo lentswe la hae, o neile Iseraele melao ya hae le dikahlolo tsa hae.

²⁰ Ha a ka a etsa jwalo bakeng sa ditjhaba tse ding kaofela, mme ha di tsebe dikahlolo tsa hae. Bokang Jehova!