Dipesaleme 146 - Sesotho 1909/1961 (SO)

Thoko e rokang Modimo ka ho re, ke wona o nnotshi o tsebang ho namola.

¹ Bokang Jehova! Moya wa ka, o rorise Jehova!

² Ke tla rorisa Jehova, ha ke sa ntse ke phela; ke tla binela Modimo wa ka, ha ke sa ntse ke le teng!

³ Le se ke la itshepela marena, leha e le bana ba batho ba sitwang ho pholosa motho!

⁴ Phefumoloho ya bona ha e fela, ba kgutlela leroleng la bona; ka tsatsi lona leo, merero ya bona e fedile.

⁵ Ho lehlohonolo eo Modimo wa Jakobo e leng thuso ya hae, eo tshepo ya hae e beilweng ho Jehova, Modimo wa hae!

⁶ O entse mahodimo le lefatshe, lewatle le tse ho lona kaofela, o boloka nnete ka ho sa feleng.

⁷ O ahlolela ba tujwang, o fa ya lapileng bohobe. Jehova o lokolla batshwaruwa;

⁸ Jehova o tutubolla mahlo a difofu; Jehova o emisa ba inamisitsweng; Jehova o rata ba lokileng.

⁹ Jehova o sireletsa baditjhaba, o emisa kgutsana le mohlolohadi; empa o kgelosa tsela ya ba bolotsana.

¹⁰ Jehova o rena ka ho sa yeng kae. Modimo wa hao, Sione, o ntse o le teng melokong yohle. Bokang Jehova!